A strada era longa, longa….. U tempu passava, è eiu era

 sempre quì, in a mo vittura à ascultà i canti corsi. A mo vittura, una « Ford Ka » turchina, era nova. I mo parenti mi l’avianu cumprata per andà in stu locu incunnisciutu. Più a vittura avanzava, è più u mo core si stringhjia. E mo mane trimavanu di più in più. Era tocca di dui sintimi. Primu, avia a paura d’andà sola, in un locu incunnisciutu, senza amichi, parenti, caccare è caccari. Ma d’un’antra manera, ghjera cuntenta di ritruvà mi appena sola, senza parenti chì vi dicenu sempre ciò chì ci vole à fà. In fine, puderìa sorte, stracquà mi è aisà mi quand’ella mi pareria. Puderia dinù manghjà n’importa cosa. È sopra à tuttu incuntraria ghjente venuta da tutta a Corsica, da Macinaghju à Bunifaziu. Riflettendu nant’à tuttu què, ghjera sempre in vittura. A strada mi paria ch’ella ùn devia finì. Mentre chì a mo canzona preferita « Sò elli » di l’Arcusgi passava una volta, duie volte è tira avanti. È eiu ne finiscìa per esse tutta insunnulita. Tuttu stu paisaghju ch’ùn avia mai vistu, isse vechje case impuntificate facianu nasce un pocu di angoscia in u mo core. Sapete, issa angoscia chì vi face sente vi tantu male chì vi si pare di esse soli soli. Qualchì lacrima sguillisce nant’à a vostra faccia è ùn sapete mancu perchè ! È una stondetta dopu, vi mettite à ride, cusì, senza ragione, sola in a vostra vittura. Ghjè cusì chì l’altri cunduttori vi piglianu per una scema !

Facia à pocu pressu un’ora è quartu chì cunducìa, è l’affare ùn finia più. D’un colpu, daretu à a Nebbia, u vidia « stu locu incunnisciutu ». Ghjera ghjunta in Corti.

Corti, issa cità induve i ghjovani vanu à fà i so studii dopu à u bascigliè. Sti ghjovani chì facenu campà sta vechja cità ch’hà vistu passà un populu sanu, da Pasquale Paoli sin’à quelli di oghje. Cità universitaria, ma dinù storica, Corti hè diventatu una di e cità più impurtante di l’isula. Cù a so citadella appullata, Corti hè dinù a vechja capitale furtificata di l’indipendenza corsa. E strade petricose di l’alta cità, collanu versu e vechje case. A chjesa, ella hè appesa. E strette di Corti chì collanu è falanu, vanu tutte versu una di e trè statule : Paoli, Gaffori o Arrighi.

A prima università hè stata creata da Pasquale Paoli. È in u 1980, Corti, a vechja capitale, ritruverà un’altra università, cù una nova generazione.

Dapoi, Corti, una di e più vechje cità, hè diventata a più ghjovana è a più bella cità di Corsica.

                          « Corte était un temple sévère, élevé sous le ciel, à l’héroïsme corse… »