A memoria.........

Di Silvia.......

Scalata da una piaghja senza anima è ghjunta in Corti, sò stata tocca, maravigliata da issa cità universitaria chì per mè ùn hè micca chè un locu di scontru di tutta a giuventù corsa è d’altrò, ma dinù un locu induve tradizioni, lingua, usi sò sempre vivi.

Ùn sò micca chè u Palazzu Naziunale o a statula di Pasquale Paoli o a citadella chì facenu a specificità di Corti, mi pare chì a cità hà sapiutu tene, trasmette una manera di campà è chì a lingua sia più sparta chè ind’è mè. Di sicuru, appena per via di a pupulazione chì hè firmata paisana è assai presente in u so territoriu. Ma a lingua hè u simbulu più forte di l’identità è si sente sempre in carrughju qualchì parolla di a nostra lingua. Si pò ancu omu adirizzà in corsu à qualchì cumerciante, accade ancu di sente da l’anziani qualchì stalvatoghju o una fola.

Ancu i giovani in certi caffè cantanu in corsu è ghjocanu à a morra, perpetueghjanu certe tradizioni.

Ùn diceraghju micca ch’ella hè a lingua di cumunicazione aduprata di manera più primurosa chè u francese, ma hè quantunque assai presente.

Hè dinù à traversu e so tradizioni chì l’identità hè viva, vogliu parlà di a cucina specifica curtinese cum’è e falculelle o i migliacci è di e ceremonie in giru à e feste religiose cum’è e prucessiò o e cunfraterne chì testimuneghjanu d’una vulintà di tramandà un ambiu religiosu di tant’anni fà.

Per mezu d’isse manifestazioni ci hè dinù una manera di campà inseme, di spartera, di cumunità. Hè forza viva da l’antichi chì anu purtatu issa cuntinuità di l’usi.

Ci hè dinù a tradizione urale chì ùn s’hè spenta, di u fattu ch’ellu ci sia sempre assai persone anziane chì stanu fora, in i caffè o in carrughju, accade aspessu di parlà cù isse persone chì ci contanu, a noi giovani assai storie, usi, chì si praticavanu nanzu, cercanu à perpetuà manere di fà. Permette dinù à i vechji di fà viaghja a memoria, li face piacè di transmette qualcosa, li si pare di esse utili, è ancu assai ch’elli sò quì !

Serà di sicuru per mè un seghjornu chì firmerà in a mo mente è chì averà cuntribuitu à arricchì e mo cunniscenze nantu à a vita oghjinca d’una cumunità di l’internu chì hè sferente di a meia.