Versione :
Corsu

UN EDITORE

Un Editore

Sentimu à Guidu FIRROLONI, direttore di l'Edizione ALBIANA è partenariu di u Centru Culturale Universitariu

RAGIUNATA LITERATURA CORSA. 06.06.2012. SIMANA DI A LINGUA………………

 

SEQUENZA UNU : U DINAMISIMU LITERARIU È SUCIALE

Guidu FIRROLONI, direttore di l’Edizione ALBIANA porta l’attenzione di i participanti nantu à a funzione suciale è, per dì la stretta, u rollu puliticu di l’editore.
Di fatti ghjudicheghja di entrata ch’ellu ùn si pò custruisce una sucetà s’omu ùn mette primura à l’edificazione di una literatura. A creazione hè per contu soiu, un pilastru centrale è quessa, a lega senza ambiguità cù a lingua sputica d’issa sucetà. Sviluppu è pratica di a lingua sò dunque elementi fundamentali di a vita in issa sucetà.
Issu pensà, applicatu à a Corsica, mette in risaltu in a storia parechji segni di dificultà è ne vene ancu à caratterizà la cum’è una « sucetà chì hà ricevutu tanti colpi in capu, una sucetà distrutta ». Appughjendu si nantu à issu tipu di custattu cunsidereghja ch’ellu ci hà cullettivamente purtatu à pensà una ricustruzzione di a sucetà chì si era quasi spena.
In u cantieru di a ricustruzzione, l’editore cullabureghja à u sforzu generale fendu affaccà u ligame necessariu trà a ghjente. Hè quessa a funzione ch’ellu insegna à a pruduzzione literaria è à a so sparghjera. Hè custì ch’ellu vede u postu è l’impurtanza di a literatura è di l’edizione chì a serve.

In a so demustrazione l’editore avvicina l »dificazione di a literatura corsa cù a custruzzione di a sucetà di a cunniscenza è l’istituzione è u sviluppu di un’università in Corsica.
In cunclusione di u so discorsu volta nantu à issi fatti ch’ellu unisce una volta di più è reassume cun l’ottimisimu u so pensà, insistendu nantu à una mossa di “qualcosa chì principia à urganizà si ».
Hè chjara pè i participanti chì issa visione di a vita literaria attribuisce un dinamisimu particulare è uriginale à una pruduzzione cunsiderata à bastanza spessu à pena scantata di pettu à e grande quistione suciale.