Stonda: U Novu Noè

Stonda: U Novu Noè

À l’instar d’ autres arts, le chant a souvent puisé ses sources d’inspirations dans le mythe, la production discographique insulaire nous en offre de beaux exemples. A cerca est le titre de l’album à paraître de Patrizia Gattaceca. Cette création s’inspire du mythe de Noé tout en s’enracinant dans la réalité.  À travers l’observation du corpus de textes écrits pour l’occasion et l’écoute d’extraits musicaux, nous suivrons l’odyssée du patriarche navigateur en route vers un nouveau destin, vers ce monde à reconstruire après le déluge. Ce projet a été mis en oeuvre durant le premier confinement aux studio l’Angelina avec la complicité de Jean Bernard Rongiconi (co-compositeur) et de Ghjacumu Thiers (co-auteur).

U Novu Noè

 

S’ellu hè sempre statu u mitu fonte d’ispirazione per l’arte, a pruduzzione discografica isulana ci ne porghje belli esempii. A cerca, hè u titulu di u dischettu à vene di Patrizia Gattaceca. Sta creazione ciumba in a Genesi cù u mitu di Noè è arradicheghja a fiura di u patriarca in i tempi d’oghje. Cù l’osservazione di testi scritti per l’occasione è l’ascoltu di qualchì strattu musicale, seguiteremu l’odissea di u navigatore in anda nantu à un mare di simbuli ver di u so destinu, issu mondu da rifà dopu à u dilluviu.

Stu prugettu hè statu messu in ballu à u Studiu l’Angelina  cù a cumplicità di Jean Bernard Rongiconi (co-cumpinitore) è di Ghjacumu Thiers (co-autore) durente u primu cunfinamentu.

« U NOVU NOÈ »

 

Qual’ellu sia u periudu, a figura di u patriarca Noè affacca trà e riferenze tutellare chì si portanu n’importa quale fora di a stonda stretta stretta ch’ellu accunsente u tempu à cuncede ad ogni esistenza. Ùn ci hè bisognu à ramintà chì i periudi incerti, difficiuli o penosi rinvianu ognunu trà noi à ripiglià cuscenza di i limiti chì toccanu à l’essare vivu qual’ellu sia. È fighjemu ch’ellu hè propiu di quessi u dilluviu epidemicu chì trasonda u mondu oghje ghjornu.

Tandu basta u nome di Noè cù a so maghjina d’eternu à passà ci in capu è fà ci luce a speranza. Una speranza bella sicura chimerica, ma cusì preziosa! À cundizione, si capisce, di traspone u so effettu à u locu chì cunvene: da u pensà à a sensibilità. Hè cusì ch’ella pò sprichjà una reazzione pusitiva di fronte à e minacce di l’adisperu.

A cultura è l’arte, propiu in stu mumentu, t’anu una parte di primura. U nostru prugettu « U NOVU NOÈ » si alza nantu à issa cunvinzione chì ci porta. Si arremba nant’à a musica è u cantu chì sò capaci à sfruttà a mansa di pussibuli d’issa riferenza chì franca tutti i tempi è l’età.

Nasce un clima pueticu duv’elli sbuccianu energia ed avvene cù isse spressione artistiche, inghjennate da sognu è nustalgia. Quesse sò belle luntane da a tristizia è u pessimisimu ch’elle cagiuneghjanu s’elle ùn sò chè fughjita da u presente è rammaricu di un passatu puru compiu è finitu. Invece quì si facenu vede atte à una creazione dinamica è chì porghje cunfortu. Parenu propiu cumu quelle sponde sempre luntane ma belle reale, isse batticce ch’ellu distingue un marinare venerabile…

Dunque eccu la a finalità ch’è no ci prupunimu. L’estetica ci si face pruspettiva, avvene è piacè. Quindi, u prufilu di u patriarca, e so iniziative è i stalvati di a so odissea, e so scuparte è e vicende quasi millenare offrenu à l’estru di l’artisti è autori una divizia di varie creazione duv’elli si incontranu l’innu è l’elegia. È tandu issu novu Noè ch’è no prupunimu si scrive digià in un prugettu esteticu ch’è no cridimu forte forte ch’ellu hè prumessa di nuvità, d’avvene…

A cerca hè u titulu di l’album chì porghje una dodecina di tituli. A cerca hè questua, quella di ogni essare umanu.

 

1 Eden

2 U dilluviu

3 Ghjente di Noè

4 L'arca

5 A merula

6 Ventu di libertà

7 Sign of life

8 L'opera umana

9 Vechje terre

10 Paese di legnu

11 U Ceppu di Noè

 

 

 

1/ Eden

 

À e cunfine più landane

Di a terra vechja

I monti anu scioltu l’azuru

 

In l’acqua di i sogni splendidi

Ella si spechja

Cresce a vita

In l’abbacinu umanu

 

A rena languita si sdraia

È L’onda alliscia 

In a so mossa bianca è pura

 

Ogni alba nova spanna visi

Sumiglie è sguardi

Cresce a vita

In l’abbacinu umanu

 

Song Song from Eden Where

I lose myself

Song Song from Eden When

I call for help…

 

In catamansa i culori

In l’aria ballanu

A pelle di u mondu hè d’oru

 

U firmamentu porghje voce

U lume sgotta

Nantu à a vita

In l’abbacinu umanu 

 

 

Andemu à coglie

e parolle di  ventu

Purghjimu canti

à e lune

Alloppiu dolce

di u tempu

Purghjimu  canti à lune

 

Song  Song from Eden…

P. Gattaceca : P Gattaceca/JB Rongiconi

 

 

 

2/ U Dilluviu

 

Si stà cheta a terra

Cù un’aria zitellesca

Ardenu i primi raggi di l’alba

Incantatu u lume

 

Da u celu chì sgotta

Incuruna e cime

 

Selva Feconda

Chjassi frascuti

Pianure è fiori

Fiume è friscura

In u zefiru dolce

 

U mare tralucente

In a rena si sdraia

Cume a pace nuda

Eterna onniputen

Ma u populu hè vechju

 

Saziu di tante brame,

È di gloria è di guerre

D’orgogliu è di  chimere

Ùn sà gode a stonda

Ne ludà u so mondu

 

Si move l’empiifondu

Ne tremanu i monti

È a manu suprana

Pone  u so spaventu

U marosu in bullore

Si para tuttu à tempu…

 

Fureste cun pianure

Animali cun ghjente…

È po’ l’onda si tace

Ed in celu si spechja

Ormai cusì pura.

 

L’immensità d’azuru

Cum’è desertu reghje

Cum’è desertu

Reghje…

 

 

P.Gattaceca/ P.Gattaceca/JB Rongiconi

 

 

 

3/Ghjente di Noè

 

A mi ai detta

È l’aghju fatta

U mondu hè nettu

A vita hè piatta

Nè in piaghja nè in muntagna

Ùn ci n’hè più piantu nè lagnu

 

L’altrò ci nasce

U sole spunta

Ripiglia à fasce

L’ora hè ghjunta

Ùn ci sò più viziu nè male

Hè a to lege solu chì vale

 

Ma vogliu dì ti

Solu una cosa

Senza ferì ti

È rispettosu

Vita ùn sarà si l’omu hè schjavu

S’omu ùn si face umanu è bravu

 

Manda li via cundanne è strazii

Laca ci à noi i nostri spazii

Campà vulemu

Senza manette

A vita a femu

Libera è netta

 

Laca li coglie cun ghjudiziu

Amore è sciali senza artifiziu

Cusì saranu

Omi è donne

È si daranu

U soiu u nome

 

Ghjente di Noe

O ghjente eroe

 

G.Thiers/ P.Gattaceca/JB Rongiconi

 

 

4/L’Arca.

 

Naviga naviga à mare mossu

Un’arca vagabonda

L’omu feghja u celu

È s’aprenu l’abissi

 

À l’ecu di a voce

U to sognu s’hè vivu

Omu l’onda ti invita

Ti chjama u destinu.

 

One way one way

my way your way

Noè

 

Animali accuppiati

Pianu pianu si destanu

È vola una culomba

à fiancu à u so paru

 

Sperenza à tiru d’ale

Di pace è di riparu

Chjama a vita Noè

Chì altru nunda vale

 

Pesa ti arcubalenu

Sò qui crescu cun tè …

 

P.Gattaceca/ P.Gattaceca/JB Rongiconi

 

 

5/A Merula

 

A burriana torna à piena

È marosu ci frumbula

L’acqua ci sbruffa l’arena

In a lisca ci scuzzula

 

Si scatena Satanassu

da l’abissi à l’alti Nuli

ci hà squassatu ogni passu

ch’ella ci insegna a Natura

 

Ma chì ghjè issu fiscu lindu

frescu cum’è musichella

sparta si culandi è quindi

pare arietta di un ruscellu

 

Or issu fiscu insegna u chjassu

di a terra tosta è sicura

da arrampicà ci à u sassu 

di un Distinu chì campa è dura

 

Sarà Voce di a zitella

Chì cantava longu à la sponda

A merula nantu à a tittella

L’ampiu volu sopra l’onda

 

 

U serenu torna spunta

è si cala u tempurale.

Eccu u litu sacru è untu

Di quellu cantu nustrale

 

G.Thiers/P Gattaceca/JB Rongiconi.

 

 

 

6/Ventu di Libertà

 

Hè storia appesa à u celente

Quella candella ch’aspetta l’ora

Di un’alba nova è splendurente

 

Pichju chì pichja è pichja torna

À crepà l’ore di u silenziu

È po à sparghje pè issi cuntorni

 

Ed hè falatu quellu libecciu

À suffià l’ora di a rivolta

À spazzà tutti i vechji intrecci

Da ch’ella affacchi a cuncolta

 

Si hà modu à circà vie nove

Chjassu ùn ci ne hè, cima ùn si tocca

S’ellu ùn ci hè più sensu di u soiu

È s’omu stà à ditu in bocca!

 

Innò ch’ùn hè à stirpà ghjente

Ma voce ghjunta à mette svegliu

È  Libertà di vita è mente

Da rifà Corsica à mezu à u mondu

 

Ghj. Thiers /P Gattaceca/JB Rongiconi .

 

 

 

7/The Sign of Life

 

Donna chì porti u mondu

In u to senu offertu è fecondu

Donna chì poni a vita

In ogni spacca di e mo ferite

 

S’accende u to sguardu

Eccu u ghjornu à vene

Diamante tralucente

Si pesanu i venti.

 

 

Woman, my angel

My freedom my choise

Beyond my pain

Over my chains

You remain

The sign of life.

 

 

Donna chì movi a brama

In l’esse meiu l’ardente fiamma

Donna chì ti sbucini

Ogni prumessa di u mo destinu

 

Donna prima

In a catena eterna

Esame ardente

Donna dedda

Nantu à l’andatu scuru

Movi i tempi futuri.

 

P Gattaceca/P.Gattaceca/JB Rongiconi

 

 

L’opera umana

 

Mi tenerai caru

Quandi i nostri passi

Truveranu a terra

da ripientà l’alivu

Dopu à tante stagione

Tù a cumpagna fida

Impasterai pane… 

 

Culleremu una casa

cù u legnu più duru

duve sò e funtane

Sumineremu un’ortu

in issu locu ritrovu

segnu d’eternità

ùn ci hè più bella prova…

 

Serà lebbiu u tempu

è colmu à muschi dolci

di muchju è di filetta

veculu per dumane

esame nascitoghju

Tale l’Opera umana…

 

Cume à u primu ghjornu

U lume spunterà

È cutratu è viulente

À rombu di purezza

Ci batterà u sognu

Cume issu core lente

Chì ci leia à a vita.

 

P.Gattaceca/P Gattaceca/JB Rongiconi.

 

 

Vechje terre

 

Sarai solu un nome

spapersu à u celente

d’un battellu sfrenatu

chì vole tuccà sponde ?

È a buriana u porta

à visticà misteri

chì anu forma di donne

è unghje di pantere.

 

Ch’ellu fussi sirene

o canti d’altri allopii

perchè vultà ci sempre

à l’antiche chimere

L’aria di e nostre musiche

Li vole taglià l’ale !

Vulemu mette pace

duv’ella rughje a Guerra.

 

À mezu à vechje terre

batte u core di l’Omu.

Penelope sbucina

l’urditu di e brame

è tesse fili novi

à l’anticu tilame.

Ulisse ci n’hè centu

à imbarcà stamane

 

Anu lampatu l’acque

ind’è l’acque di i porti

è alzatu bandere

linde cum’è surrisi…

 

Ghj Thiers ./P Gattaceca/JB Rongiconi

 

 

 

Paese di legnu

 

Esse un arburu

Geniu vegetale

Esse muvente

Arrittu

 

Esse un arburu

Paese di legnu

Esse u locu

Muvente

Esse muvente

 

Fiaccula nuda

Chì piccia è sumena…

 

Esse un arburu

Figliu di e lune

Esse maestru

Superbu

Esse maestru

 

Esse un arburu

Paese d’impegnu

Esse u tempu

U fiatu

Esse u tempu.

 

Fiaccula nuda

Chì piccia è sumena

 

Porghje l’acqua

È u fruttu

Curà i sogni verdi

Chì squassanu l’amaru

Di e sponde…

 

P. Gattaceca/P.Gattaceca/JB Rongiconi

 

 

U CEPPU DI NOÈ-2

 

Tutte e teppe imbrustulite

duve ùn ci hè mancu rimigna

e vogliu piantà cù a vigna

chì da Diu hè gradita

da purtà ci sole è vita

da u fondu sin’à in cima

 

Ùn si tratta mancu à pena

di perde mente è rigiru

ma piantà speranza è vita

duve l’acqua hè poca è micca

è ch’ùn cresce chè picondria

trà isse pendite infeconde

 

Vogliu sceglie a pianta ghjusta

ch’hà da stirpà a sicchia

quand’ella hè pregna di sole

face suchju inzuccaratu

cù e so gaspe granaghjole

appruntemu li e paghjole

 

Quellu chì ci darà iss’uva

piglierà sensu fecondu

sunarà è forte è zeppu

u so nome sarà “Ceppu”

è sparghjerà pè u mondu

a divizia sopra l’onde

 

 

 

I 1000 ANNI DI NOÈ ?

 

A terra ch’o dicu eu

ùn hè terra à l’anticogna

face una vita chì a vecu

si avvicina cum’è un sognu

Mi ci accostu à l’allesta.

Picci è imbrogli

eiu l’assestu...

 

Novecentucinquanta anni

ùn sò tanti anniversarii

spergu di ùn truvà malanni

da arrubbà mi u milennariu.

Ma solu mille anni di vita

saria a sorte di un rimitu!

 

Mancu mi vogliu annuchjà

ma contu di ùn sparì mai

aghju tanti affari à fà

cum’è nimu oramai

Tandu ùn possu fà di megliu

chè di stà arrittu è svegliu!