Terra Nostra, dischettu esciutu in u 2018 ind’è KIF Music, cuntene tredeci tituli è si presenta cum’è un carnettu di viaghji. Si pò dì ch’ellu hè un innu à a Terra Madre è quessa a palesa dinù u disegnu presentatu nantu à u stucciu, spiratu di e Venere Graveziane è fattu da u pittore, plastizianu è fotografu Dumenicu Degli Esposti. L’internu di u librettu cuntene parechje pruposte liate à iss’ispirazione. A cuncepitura grafica hè di Armand Luciani.

I testi l’aghju scritti dopu à avè accatastatu maghjine durente i mo viaghji. U testu nantu à Bastia l’aghju dumandatu à Ghjacumu Thiers.

Aghju cumpostu a musica ma travagliatu cù una sguadra di musichenti talentosi. Sò ghjunti à ghjucà nantu à issu dischettu : Loïc Pontieux cù a batteria è e percussioni, Laurent Vernerey cù a chitarra bassa, Lionel Suarez cù u Bandoneone è di sicuru e parte di chitarre è di tastere cun l’assesti musicali l’hà fatti l’amicu è complice di tant’anni avà, Jean Bernard Rongiconi.

U missame l’hà fattu un ingenieru attalentatu, Cédric Pontieux.

Stu prugettu hè dunque u fruttu di una spirazione vagabonda, d’impressione putente ormai stampate in mè, chì piglianu nascita in core à cità o à territorii emblematichi duv’ella s’invita senza retta a puesia.
Terra Nostra prupone scali vicini o luntani, in giru à u Mediterraniu o puru più luntanu in America latina è finu à e cime di l’Himalaya.

Di isse cità tamante, di sti spazii misteriosi, cattiventi, carchi à storia è lochi di cunfluenze di culture, ne scopru a bellezza. Quì, in core à l’universu, furestera, libera d’ogni leia, infattu sguardi scunnisciuti è qualchì volta nascenu relazione effemere. Mi lasciu purtà da u ritimu trepidente di e folle, in u labirintu di i carrughji, pè e piazze aperte nantu à u mondu o in a desulazione di sulitudine immense. Sò lochi duve qualchì volta mi perdu ma spessu mi ritrovu,
lochi chì tessenu destini. Sentu batte u so core, inventu tandu a leia chì ci unisce, à u filu di i mo passi, à l’asgiu di e mo brame… Diventanu tandu una questua persunale chì seduce è interrugheghja.