MESSA A GHJORNU 30 DI SETTEMBRE 2012
Vita di l'associu
![Presentazione di BONANOVA Presentazione di BONANOVA](https://interromania.com/sites/default/files/styles/image_400xx/public/bona_17_verdoni_di_meglio.jpg?itok=Q786gJK8)
Presentazione di BONANOVA
Ci vulerà u tempu da trasferisce i ducumenti da l'anzianu situ à questu quì. Cuntinuemu...
Oghje, eccu dui ducumenti novi per sta messa à ghjornu di u 30.09.2012:
1) Un’età d’oru di a literatura corsa ?
13 VIDEOSEQUENZE (in a rubrica: Literatura > Cumenti è parè) Sò stratte da una filmata fatta à l’occasione di una stonda di puesia è baratti di parè è cumenti in quantu à a literatura corsa, in lingua corsa. Era anni fà per l’esciuta di Bonanova nu15. Ci hè parsu utile di vultà nantu à issa stonda, puru s’ella hè di pessima qualità a filmatura.
- LETTURE DI PUEMI E DI PROSA in corsu, gallurese o maddaleninu, spagnolu è francese. Ci si sprime a creatività di i scrittori corsi o vicini. Trà quessi, emu rivistu cun dulcezza ed emuzione a passata duv’ella ci dice a so passione di a cultura nustrale Mattea CASANOVA, quella amica cusì brava, generosa è alegra malgradu i castighi di a malatia chì a si hà purtata via. O Mattè, ti vidimu, ti stemu à sente cù i to belli puemetti fini è discreti, è sì sempre cun noi…
- INTERVENZIONE E CUMENTI, a quistione chì l’attraversa è i lega tutti quanti hè quella di "l’età d’oru di a literatura corsa", s’ellu ci n’hè stata una o micca.
Hè vera chì quasi tutti i cumenti è discorsi vinti anni è più dopu à u 1970 ripetianu chì u cusidettu RIACQUISTU era statu l’epica di a nascita vera di una literatura corsa maiò, sbarrazzati di e so pediche è in particulare u passatisimu, a nustalgia è u pruvincialisimu. Passava dinù per l’epica chì attori è temi di a literatura corsa eranu più accapati à sprime u culettivu di u populu corsu chè a forma individuale di e primure, i sintimi, l’idee è u pensà in quantu à a vita, l’omu è a so cundizione.
Issi parè sò dinù presenti quì, ma si sente chì qualcosa hè cambiatu in u frattempu, è forse ùn ci ne eramu mai avvisti in modu cusì chjaru. Di fatti e riflessione di quelli chì difendenu l’idea di u RIACQUISTU da riferenza in issa stonda sò in cuntrastu cù altri punti di vista. È quessi custì sò a magiurità. Mettenu in causa isse certezze è custruiscenu una critica astuta è salutifera chì insiste di più nantu à a custruzzione di u presente è e pruspettive da vene chè l’ammirazione di u passatu è u « miraculu di u 1970 ».
• M.CASANOVA dice dui puema di soiu (BN n°15) (testu in a rubrica: Literatura > Puesia)
• G.M.COMITI leghje un scrittu di Giulio COSSU di Tempiu Pausania in gallurese (testi è presentazione in e rubriche: Literatura > Prosa è Literatura > Cumenti è parè.
• D.VERDONII dice (francese è spagnolu) dui puemi di Reyes de Gregorio (testi in a rubrica: Literatura > Puesia)
• A.DI MEGLIO presenta à Petru Matteu SANTUCCI chì leghje un puema di soiu (testu in a rubrica: Literatura > Puesia).
• P.BRUSCHINI dice un puema di Rinatu COTI (testu in a rubrica: Literatura > Puesia)
• A.DI MEGLIO leghje un puema di Gian Paolo TUSCERI in Maddaleninu (testu in a rubrica: Literatura > Puesia)
• A.SECONDI (studiante) leghje un puema di A.DI MEGLIO (testu in a rubrica: Literatura > Puesia) ch'ellu mette in relazione cù u cuntestu sociopuliticu
• G.FIRROLONI (Albiana) dice a so visione pusitiva di l'avvene literariu corsu (in a rubrica: Literatura > Cumenti è parè).
• PM.FILIPPI ammenta u so libru "Un Persu in Alisgiani" è l'affaccà di l'individuu in a spressione literaria corsa(in a rubrica: Literatura > Cumenti è parè)
• G.GHERARDI rimarca chì ogni epica corsa si face un'età d'oru (in a rubrica: Literatura > Cumenti è parè)
• P.OTTAVI rimarca cum'ella si affacca a figura literaria di l'individuu (in a rubrica: Literatura > Cumenti è parè)
• A.DI MEGLIO presenta à R.COLONNA, studiante (Voce Ventu è l'anni 1970) (in a rubrica: Literatura > Cumenti è parè)
2) A Tristizia di Patrizia ?
(in a rubrica: Literatura > Cumenti è parè
Presenta u parè di P.M.FILIPPI in quantu à a puesia di P.GATTACECA. S’ella hè trista a puetessa si sarà ralegrata cun noi tutti d’issa bellissima racolta Anima soul (versione corsu-inglese) di i so puemi ispirati da a tematica di l’isula (in a rubrica: Literatura > Puesia)
3)E Porte di a Puesia
(in a rubrica: Literatura > Puesia).
Hè l’iniziu di un’opera chì vole custruisce un casale di a puesia corsa d’oghje. Un’antulugia viva chì si accrescerà ad ogni messa à ghjornu. Principiemu cù e trè puetesse ch’omu pò sente, leghje in corsu (cun traduzzione francese (PM.FILIPPI,FM.DURAZZO) è inglese F.BERETTI). Sò trè stratti da u DVD PUESIA CORSA, fattu da u CCU è presentatu di ghjugnu scorsu (ci ne ferma ammaniti unepochi ; à chì hà primura u ci dumandi per e-mail : asso.ccu@wanadoo.fr Ci farà piacè di rigalà lu).
Dunque si principia cun P.GATTACECA, S.MORETTI è L.SANTUCCI ; cuntinueremu cun l’altri pueti in e prossime messe à ghjornu. Hè previstu di inserisce altri pueti è e so cumpusizione.