À mezu à u Punenti maritarraniu a Corsica hè in bocca à tutti i venti chì soffiani da u mari.

U Libecciu. Soffia da u Meziomu Punenti, è propiu da Puneùu pà u nordu di l'isula è a Balagna. Soffia da un capu d'annu à l'altru d'istatina hè caldu è asciutu, d'inguernu hè carcu d'umidità è porta l'acqua à bundanza nantu à a costa di u Punenti. A Livanti, hè piuttostu asciuttu.

A Tramuntana. "Tramuntana fresca è sana" dici u pruverbiu. Soffia da u nordu è da veru hè fresca è asciuta. Soffia d'inguernu. U so rughjonu prifiritu hè Aiacciu.

U Sciloccu. Soffia da u meziomu uriintali. D'istatina hè caldu è asciuttu, trascina una pula russiccia. D'inguernu dinò hè caldu ma porta l'acqua.

U Maistrali. Veni da u nordu punenti. Traghji di più in Aiacciu cà in lu Bastiacciu. Si dici ch'eddu soffia 3,6 o 9 ghjorna fili.

U Gregali. Fala da u Nordu uriintali. Soffia u più in lu Bastiacciu. Hè carcu d'umidità è porta l'acqua.

U Muntesi. U ventu di a muntagna. Parti da l'alti cimi è si capula in li vaddi. Nisciun locu di Corsica ùn la si franca.

U Marinu. U ghjornu, à sensu cuntrariu di u muntesi, u marinu hè un vintuleddu chì parti da u mari è riscalda i vaddi.

Extrait de « Parlemu corsu 3 », Squadra di u Finusellu, 1990, Ajaccio