Scontru culturale in caffè
Puesia
![](https://interromania.com/sites/default/files/styles/image_400xx/public/feli_travaglini-1.jpg?itok=aE5gfNRk)
![](https://interromania.com/sites/default/files/styles/image_400xx/public/feli_travaglini-2.jpg?itok=txJ8BPOJ)
Feli Travaglini dettu Feli hè natu in 1966 ind'i Fulelli, in Castagniccia.
Hà sempre avutu a passione di a musica è forse ch'ella ci hè stata per assai quella vechja chitara à duie corde trova da chjucu in granaghju ?
Elevu di Lucien Ferreri, ghjè prima a musica classica ch'ellu hà studiatu.
Hà fattu parte di A filetta, i Surghjenti, avanti di cumincià una carriera di cantadoru, autore, cumpositore, solu, in 1989.
Ghjè u scontru è a cullaborazione durante 32 anni cū u poetu di Loretu, Ghjuvan Teramu Rochi chì hà lasciatu una stampa in a storia di a Corsica, da a prima canzona "Terra è onde" à "À voline più" quandu i testi è e melodie sò stati trà elli elaborati in u scambiu permanente.
Duie parulle nant'à Ghjuvan Teramu Rocchi :
Ghjuvan Teramu hè natu in Loretu di Casinca in 1940 è ghjè sparitu in 2018.
Hè statu Institutore militante, pedagogu, poetu. Ghjuvan Teramu hà sviluppatu programmi d'amparera di u corsu cum'è u primu manuale cuncipitu à parte d'una sperienza di scola d'estate in u so paese Mamma O Mà ! U corsu in prima scola, in 1974. Hà scrittu tantu per l'artisti Corsi è fattu per a lingua corsa in scola chì una sala di l'Alboru porta u so nome in ricunniscenza.
Ghjuvan Teramu hà cunsigliatu à Feli di scrive ellu stessu e so canzone.
Anu dinò fattu inseme un discu per i zitelli è Ghjuvan Teramu hà capitu chì Feli era pedagogu, capace d'insegnà à i chjuchi, cum'ellu l'avia fatta ellu, u primu.
Feli hà pruduttu cun i zitelli "Brame zitelline" un discu di canti per e scole in u 1994. Dumandatu in isse scole, aiutarà à prumove l'insignamentu di u corsu è à mette i so acquisti educativi à u serviziu di "Scola in festa" ch'ellu apre in casa soia à I Fulelli è duv'ellu insegna a musica è u cantu cù a so squadra à più di 150 zitelli, da 3 à 15 anni.
In u 2014 nasce cù a so scola, "Cantà, Cantà, Cantà" è in u 2020 "Puppeppu", dui dischetti fatti di canti, puesie è filastroche, distribuiti à tutte e scole di l'isula, fendu torna prova di a primura di Feli per l'insignamentu di u corsu.
Certi picculi cantadori di Scola in festa sò nati quì ma ci sò dinò i figlioli di ghjunghjitici, ciò chì face d'issa scola un arnese d'integrazione.
Cum'è Ghjuvan Teramu, guida spirituale per ellu, Feli vole trasmette à i più giovani afin chì a lingua corsa è a so musica campinu, chì a dizzione sia rispettata è trasmessa.
Quand'ellu li si dumanda, quassa hè a to canzona preferita, risponde, ghjè quella ch'ūn aghju ancu scrittu.
Cathy Campana
Presentazione di Feli, artistu invitatu in i scontri culturali in caffè di u 23/12/22.
Scontru culturale in caffè
Sta sera à u Novelty
Emu invitatu à Felì
Per i scontri hè venutu
À dà appoghju è aiutu
Senza contà e so ore
Eccu un omu di core
À lu nostru cantadore
Noi vulimu rende onore
Pronti à sciaccamanà
S'ellu accetta di cantà
Da Folelli à Bastia
Ci porta tant'allegria
Si scambia in lingua nustrale
A favella ancestrale
Riacquistà l'oralità
Ghjè u nostru scopu avà
Sapimu chì grammatica
Ūn vale senza pratica
O cari fate u piacè
Parlate corsu à più pudè
Ch'ellu ribombi à l'eternu
Da fà riflette u guvernu
Ci tocca a santa missione
Assicurà a trasmissione
Cathy Campana
23/12/22