3 autori, 3 scritti, 3 editori
è Mediterraneu unu solu !

    Issu prugrama hè una nova ventura ch’è no pruvemu oghje. Si tratta di aiutà a publicazione di opere di qualità pensate in u quatru di un dialogu edituriale trà trè editori mediterranei : Albiana-CCU, Condaghes (Casteddu in Sardegna) è Fonoll (Lleida in Catalogna). Cusì si prevede di caccià trè libri à l’annu è di fà affaccà un cullettivu di traduttori in lingue minurizate. Vi pensate ch’ella ùn hè cosa sfaticata ! Sinu ad oghje emu pussutu dà capu guasi à u primu lampu di issa opera. I primi tituli cuncernati sò :

    A ballu tango di Antoni Arca d’Alghero, Un tangò trà Argentina è Sardegna (in corsu), Duty free (in catalanu). Un omu aspetta l’aviò. Un altru omu ghjunghje in casa di un amicu. Un omu è una donna sò in lettu. Un giovanu studiente in lingua vole intervistà u patrone di un alivetu. Lochi spiccati, tempi differenti, ma tuttu si intreccia trà isse situazione. U filu di a vita corre è cosge tempu passatu è futuru. È po ci hè issu presente, tempu viotu è fermu di l’aspettà. Ma ogni azzione, ogni gestu, ogni pensà cuminciatu dumanda ch’omu li dessi capu.

     L'ultimà pàgina di Georges De Zerbi di Bastia, S'ùrtima pàgina (in sardu), Última Plana (in catalanu). A storia principia cum’è quella di tanti Corsi chì tornanu à gode si una ritirata meritata, linda, calma è serena. Ma Anton Paulu, chjappu in un cuntestu sociupuliticu propiu novu, hà da esse purtatu, contru à e so idee, à aiutà un gruppu di giovani clandestini per mutivi di sulidarità culturale. L’azzione ammenta a Corsica d’oghje à mezu à quelle scene di a Bastia di sempre: e pisciaie, i bagni in Puntata, l’isule in faccia è tanti altri ritratti chì u lettore ritrova in sè, visione di a cultura nustrale

    El collidor de vesc di Pau Urgell (Lerida), L’omu verde (in corsu). Conta l’affaccu in paese di un omu stranu. Sempre solu. Bruttu cughjosu. Andaccianu è rimitu, mette suspettu è interessu. Prigiuneru per 300 anni di l’arburu duv’ellu cuglia viscu, hà da esse identificatu da messia di una nova religione, sincretisimu trà dogma eculugistu è religione di l’occidente. Una satira di u bisognu sempre sempre di trascendenza puru in l’epiche più realiste è materialiste.

In Barcelona, cun G.GARBATI, presidente di i Sardi di Spagna (1u à diritta)

    Quand’ellu si piglia issi libri, senza studiu appinzatu, à fil’di lettura, spunta una parentia trà lingue rumaniche. È issu fondu patrimuniale permette ancu di induvinà è di sente chì custì ci hè un imaginariu cumunu chì li venerà più offertu s’ellu hè più praticatu.
     L’editori partenarii si sò scontri parechje volte è anu participatu inseme à varii avvenimenti culturali in Sardegna è in Catalogna, à l’occasione di manifestazione à favore di u libru, in particulare in Cagliari (Assessorato à Sa Limba), in Lerida (Tres llengës, tres cultures) duve G.Firroloni è G.Thiers anu fattu u puntu cun Antoni Arca, Francescu Cheratzu, Josep Gelonch i Solé è Jaume Gaupera, è di ottobre, in a Fiera di u libru in Macomer (Sardegna). Barattu di libri, d’idee è di prugetti di scrittura in cumunu, è sforzi da fà circulà a roba stampata (a cronaca di Ara di u 7.12 a dice una cria)

      A più parte di i nove tituli sò dispunibuli è tutti saranu ammaniti in e librerie allocc’à a fine di u 2012.

A.ARCA : A ballu tango, Condaghes,Cagliari, 2009.
Un tangò trà Argentina è Sardegna, Albiana-CCU, Aiacciu, 2010.
Duty free,editorial Fonoll, Juneda, 2010
G.DE ZERBI : L'ultimà pàgina, Albiana-CCU, Aiacciu, 2009
S'ùrtima pàgina, Condaghes,Cagliari, 2010
Última Plana, editorial Fonoll, Juneda, 2011
P.URGELL : El collidor de vesc, editorial Fonoll, Juneda, 2011
L’Omu verde, Albiana-CCU (in stampa).