ANTONE,UN BANDITU D'ONORE.

 

E mamme ind'i tempi si facianu volenteri narratrice. I spettatori l'avianu sottu a manu, i so figlioli. Di televisiò ùn si ne parlava ancu.
I zitellucci ascoltavanu è ritenianu. Oghje, e so parulle fermanu stampate in elli pà u sempre.
Isse mamme eranu passiunate da parechji tema.
 

Ci n'era una chì tenia à core d'una d'isse donne, l'evocazione di a vita d'un omu fermatu pà ella una leggenda, u so corciu babbu.
Antone ùn avia micca avutu una vita semplice.
Prima di diventà un babbone di i più affettuosi, era statu unu di quelli ch'omu chjamava in Corsica, banditu d'onore.
À iss'epoca, in 1870, i Corsi si facianu a ghjustizia à di per elli, c'era pocu à aspettà da l'autorità Francese.
Hè cusì chì stu giovanu, calmu, senza storie, s'hè credutu obbligatu di tombà per difende u s'onore.
Campendu in una piccula cumunità, lascià si mancà di rispettu riprisentava tandu a morte sociale.
L'omu avia l'obligazione di fassi la à valè, un pocu cum'è in issi western visti à u sinemà.
Antone campava in Castagniccia in un paisucciu acciucciulatu di Castagniccia.
Era capimaestru, curava i ghjurnatanti sott'à i so ordini.
L'autorità era un appoghju tremendu per Antone, ùn pudia lascià passà nunda.
Un ghjornu l'ordine soiu cascò nant'à unu chì li ne vulia.
Invece di fà ciò chì l'era chersu, l'omu rispose per dispettu, " - tù sì una merda".
Antone fissò st'adversariu inaspettatu è li disse cū a calma. " -Veni di parlà mi d'una manera ch'ùn possu accettà. Sò pagatu per curà vi è tù mi voli inghjulià dinanzu à tutti. Ti lasciu a pussibilità di pente ti di ste parullacce, mi ne vò duie ore, quandu ritornu t'aghju da pone una sola quistione. Videremu sè t'ai cambiatu d'avisu."
Duie ore dopu a risposta di l'omu à Antone fù listessa.
À à sorpresa generale, tandu Antone pigliò u fucile è fece falà u ribellu à i so pedi.
A so sentenza era stata appiecata subbitu subbitu, senza nisun' tribunale.
Per ùn andà in prigiò, Antone pigliò a machja è cuminciò una vita di banditu straziata è piena di periculi mortali.
A contava à veghja, quand'ellu avia a barba bianca, di st'annate passate in issa machja à guardà si di i gendermi, à pate mille miserie.
E giovanotte di u paese chì andavanu à coglie e legne, temivanu di scontrà u banditu. E sentia quand'elle ne parlavanu, spaventate. Ellu allora, si piattava per ùn fà li paura.
Era un veru banditu d'onore, micca cum'è quessi chì nucianu à a ghjente è prufittavanu di a so situazione per cumportà si in omi di forca.
Per salvà si Antone si n'era andatu sin'à in l'America, un paese strasordinariu à l'ochji di stu paisanellu.
Eppoi ghjunse quellu ghjornu induve s'hè messu in manu à a ghjustizia, forse sapendu à l'avanza chì e so pene li serianu rimesse per via di prescrizzione.
I gendermi l'anu fattu dorme in "un lettu di piume".Tant'anni dopu ùn si n'era mai scordatu di stu cunfortu scunnisciutu.
Secondu a figliola, u so babbu ùn averia mai fattu prigiò.
D'altre persone anu ripetutu quantu i so paisani rispettavanu à Antone diventatu u babbone bellu tranquillu chì si n'hè andatu à finì a vita incù a so famiglia per aiutà li.

A figliulina ne parlava cun emozione. Caru babbone, ūn t'aghju mai vistu, sò nata dopu, quand'è tu durmive in campu santu, ma ti tengu caru è sò fiera di tè ! L'amore hè natu cū issa trasmissione da mamma à figliola. Stu picculu scrittu hè un umaggiu ch'o ti vogliu fà, cū tant'affettu.
 

Cathy Campana