U trenu di Bastia

Petru Mari (Diodoru di Sicilia, 1995)

Eramu di settembre in iss'isula strana è bella chjamata Kallistour da i Grechi. Di settembre, quandu i paesi sentenu di novu odore di pensione di vechjaia è di cumbricula in stufatu. Cansatu in piazza di Cugnoli-l'Appicciu, fiatendu, videndu. sentendu, parlendu. Diodoru vulia cunnosce e primure è i penseri di issu populu originale. U so sguardu si piantò nant'un casale altu è guadratu. Di punta à u scalone ci era un pruprietariu soddisfattu chì fidighjava. Techju è aripusatu quant'è un poia, fecia tintinnà i so cinquini in stacca. Fidighjava l'abboccu di a ghjente in gara chì aspettava u trenu di misure d'ondeci ore è quaranta cinque. Diodoru s'avvicinò d'un giuvanottu smisuratu è tetru, appughjatu di goditu à l'ala di u so toiotà, è li cherse :

"O amicu, eo sò furesteru è ùn ci capiscu, ch'aspettate ?
"Sò osteriaghju, aspettu a mio misura pè u trenu d'ondeci ore è quaranta cinque".
Diodoru rispose. stunatu :
"Ma sò meziornu è cinque..."

U giuvanottu, cum'è per scusassi li cappiò :
"A sò, ma hè un trenu omnibus, è quì simu in fine di ligna. Allora s'aspetta."

Diodoru di Sicilia s'alluntanò capighjendu è pensoni. Si dicia in pettu :
"in iss' isula strana è bella chjamata Kallistour da i Grechi, à a minima misura chi ghjunga pè u trenu enu, per poia è altri osteriaghji, sò affanni è crepacori..."