Di sicuru ci sò i pozzi celebri di u pianu di u Cuscionu ma micca solu. Pozzi, ci n’hè ancu à a surghjente di u guadellu Pozzulu, da duv’ellu esce u Prunelli. Ùn si cunnosce tantu u parcorsu chì ci và è u situ hè praticu pocu è micca. Garbanu di più i pozzi di Bastelica, di Ghisoni o dinù di u Lavu di Ninu.

Direzzione a bocca di Scalella nantu a cumuna di Tavera. À a foce, situata trà i paesi di Tavera è Bastelica, ci hè una longa pista pratichevule quasi sin’à l’ultimu cù una 4X4. Toccu a fine, ci vole à sculinà u chjassu ch’ùn hè insignatu tantu bè ma ancu di grazia ferma qualchì cairn quì è culà.

Prestu prestu omu si trova propiu in altura, 1600 metri di media. Di sottu, si pò distingue i stazzi di u Verdanese. Si ghjunghje nantu à un primu puntale chì dà l’impressione d’esse sopra à ogni puntu. Luntanu, fieru fieru si alza u Monte d’Oru. Più in fondu, vecu ancu a punta di a Paglia Orba in a serra di u Cintu.

Si volta nantu à a pista è da pudè cuntinuà l’ascensione in direzzione di i Pozzi. Si tira avanti pè una stundarella sin’à e ruine d’un stazzu chì s’affaccanu. Hè ciò chì ferma di i stazzi di Penta. ma una di e case hè magnifica cum’elli l’anu ristaurata è di fora ci hè ancu un fornu in petra.

U chjassu cuntinueghja ver’di a sarra di u Rinosu duv’ellu sorge u ruscellu di u Pozzulu. Un pannellu in legnu insegna i dui chjassi : à manca, Bicugnà, à diritta a bocca di Vetta. Ci vole à piglià quessa, à diritta. A Vetta hè una foce chì permette di ghjunghje nantu à u pianu di u Rinosu, una tappa di primura di u famosu Frà li Monti (GR20).

Dopu caminatu 2 ore 30, omu si avvicina puru da i pozzi. Ancu di grazia chì da u pannuncellu cairns ci ne hè propiu assai è ci sò ancu i marchi culutiti nanru à i scogli. Si ghjunghje puru puru sin’à l’erbe fitte fitte di i pozzi. U situ hè à stà ne à bocca aperta. A carta mi dice ch’e sò à u pede di u Monte Capanella, chì culmineghja à 2250 metri. U locu hè quellu ideale da rifiatà una stonda è ancu fà ci merendella.

Si pò dinù cuntinuà chì issu percorsu và à u lavu di Bracca pè a bocca di Vetta. ma ci vole à cuntà 1 ora 30 à 2 ore in più partendu da i pozzi. Da custindi, pare ch’ellu si pò vede dinù u lavu di Vitalaca, duv’ella esce a surghjente di u Prunelli..