In prima ci saria l’impressione di un ritrovu, u solitu appuntamentu, è po u sintimu di esse rassicuratu da unipochi d’indizii lasciati per ùn perde si : un ritimu, l’echi di una musicalità ricunnisciuti chì puntelleghjanu a scrittura. Ci sò di i libri chì parenu appartene à un inseme di più allargatu custruitu à pocu à pocu, cum’è pezzi di una musaica, è piglianu sensu in issu chjama è rispondi trà una opera è l’altra. Ma tandu firmeria pocu spaziu per a supresa. In issa ultima racolta puetica di Patrizia Gattaceca, « Paesi ossessiunali », si accorghje omu lettura facendu chì qualcosa stona. Ùn hè per via di a scelta di e tematiche, queste sò digià state scavate, ma per via di a so manera di accustà le cù fiure singulare, palisendu un raportu inchietu à u « locu », unu è multiplice. Issi « paesi » indefiniti in i quali ci stanu i significati tutti di’ssa parolla è ancu quelli sunniati. Pare chì issu locu ùn possa esse fighjatu di modu direttu, una impussibilità o una vuluntà di ùn inchjustrà lu micca. Da cunnosce lu abbisugneria di seguità i so orli, chjappendu l’avvinte da avvicinà lu, in un passa è vene cuntinuu da i cunfini di l’infora à u vultà in sè stessu. D’altronde, e sfarente sezzione di a racolta, « utopie », « altri alti », « cerca »…, insegnanu issu percorsu chì cunduce u lettore.

È l’ossessione, perchè ? ne saria a spressione ogni puema, una traduzzione ghjuvendu si di e maghjine dispunibule o inventate, da mette a distanza è appacià l’ossessione spugliendu la, senza ch’ella diventi neutra, lascendu li u so carattere « intranquillu » chì asconde l’interrugazione. Ossessiunale, tandu, sarianu isse fiure imposte si à di per elle, vultendu regulare da tribbulà è impastughjà u pensà - ùn scurdemu ci chì « obsidere » significheghja fà l’accampu - o ossessiunale sarà l’attitudine di chì scrive, ripigliendu isse fiure cum’è s’elle eranu piaghe chì si ricuseria di curà ? A scrittura, cum’è unicu sboccu, permetteria forse di liberà si ne. Dicendu quessa, ci hè sempre u risicu di a dramatisazione, mettendu in scena cù un lirismu tricaticciu l’attu di scrive, è ùn si cunfaceria mancu appena cù issa racolta, duve si sente quantunque u piacè di dì chì, in a scrittura di Patrizia Gattaceca, u fondu ùn rinunzia mai à a legerezza.