U LIBRU IN CORSICA STI MESI DI STATINA

Per l’estatina culturale di st’annu 2018, si senterà dì cum’ellu si sente di più in più à misura ch’elli passanu l’anni, chì oghje ùn hè più cum’è eri è chì più và, più vene rara è difficiule di vede à chì puntu ne simu di un’affirmazione nustrale ritrova, accertata è assicurata da u Riacquistu iniziatu in l’anni 1970.

A divizia di l’edizione è di l’animazione literaria in varii punti di l’isula invece di rassicurà è di dà fiducia, spessu face spuntà in a vuciata cutidiana ch’elle piattanu u statutu pocu quentu di a spressione corsa. Quessa saria assuffucata da e creazione è prudotti di fora. Si và sinu à pratende chì oghje a robba di quì saria trasundata da quella ghjunghjiticcia. Unepochi di discorsi pessimisti assai si lagnanu ancu chì oghje ùn si scrive più in corsu è di sicuru ch’ùn si leghje più i libri redatti in lingua di quì. Per quessi basta à ùn accuntentà si di i parastagi di e librerie. Ùn ci vole à filicà tantu è, puru nantu à u net, ùn si stà tantu à avvede si chì issi lamenti sò robba falsa. Sarà ancu una bella scusa per passà bellu è pudè cuntinuà à pruchjamà forte forte a necessità di un statutu pè u corsu è alluntanà si persunalamente sempre di più di a pratica di a lingua, cumpresu a lettura.

S’omu feghja e cose cum’elle vanu in realità, sarà forse più ghjustu à rimarcà è ritene pusitivu u barattu oramai stabilitu trà e spressione chì si incontranu à l’occasione di i scontri, mostre è fiere di u libru quì è culà. I rapresentanti (scrittori, autori, editori è lettori) d’isse spressione in dialogu ùn sarà megliu à pensà chì u barattu porghje, da tutte e bande cuncernate, influenze è cuntatti utili è fruttiferi qualsiasi a spressione è a lingua in ballu? Issa cunsequenza pare evidente sia in u quatru di a creazione sia in tutte l’altre tappe è mumenti di a “circulazione” di u libru, vendita è lettura cumpresu.

Un altru affare hè, ghjustu à puntu, a quistione di a lettura di ciò chì hè purtatu sinu à l’edizione è a messa in vendita. Tuttognunu sà chì oghje ghjornu, in più di u so cuntenutu creativu è/o infurmativu internu, un libru hè un prudottu chì a so sparghjera dipende pè u più di u circuitu duv’ellu hè spartu è cunsumatu. Un circuitu duv’ella si impone a qualità di l’opera ancu di grazia, ma micca sempre... E cunsequenze di i Premii literarii, e varie mode di generi, e trattazione cumerciale, l’alliscià è a bischizza ci anu a so parte dinù.

Da un’altra banda si sà chì a critica spezializata chì eri li assicurava u più di a so nomina hè stata cambiata assai. È cusì “l’ogettu libru” spessu esiste più per via di a nomina, u rimore ch’ellu li si face ingiru chè da e so qualità intrinseche. “L’istituzione literaria” hè, da issu puntu di vista, mutata assai di qualità è di andatura. Senza allungà si la torna, bastarà à rimarcà chì parechji redattori di resiconti critichi in quantu à i tituli esciuti danu l’impressione di ripete ciò ch’elli anu lettu in e critiche digià stampate, è ancu spessu spessu, in qualchì cumentu chjappu à a lesta in certi blogs chì ne anu dettu duie parolle ! Tandu, ùn saria più necessariu à leghje u libru sanu sanu!

Ma zittu! Ch’ell’ùn ci senti mancu l’aria!