Dì, ciuccetta, lascia mi ch’o ti contu u mondu di dumane, un mondu induve l'imaginazione è a realità ballanu inseme in un valsu di pussibulità infinite. In issu futuru luntanu, e cità gallighjeghjanu maestose in u celu, purtate da balloni tamanti è mascine volante à ale d'argentu. E case, sculpite in vetru è luce, spampillanu cum’è ghjuvelli sottu à u celu, è i giardini appesi sò tappizzerie vive, trabuccate di fiori chì cantanu è chjachjareghjanu à l’albore.
A ghjente si move nantu à tappetti volanti o biciclette aeree, sculiscendu trà i nuli cù una grazia serena, cum'è pesci ind’è l'acqua. I zitelli, cù a so mente curiosa è acuta, da chjuchi, amparanu à codificà universi virtuali, creendu mondi induve ponu scopre galassie luntane, ciuttà in a prufundezza di i mari, o ancu cavalcà dragoni di dati.
A tecnulugia è a natura coesistenu in perfetta armunia. L'arburi, dotati di sensori, cantanu dolce meludie chì contanu i so bisogni d'acqua è di nutrimenti, è i fiumi, cusì chjari è puri, sò nastri di cristalli induve i pesci brillanu cum'è stelle sottu à l’area.
In ‘ssu mondu, a malatia hè diventata una legenda antica, perchè chì i duttori, armati di nanoautomati è utilizendu tutte e piante di a natura, curanu e malatie prima ch’elle si manifestessinu. A ghjente campa una vita longa è spannata, è ogni sera si sparte e so storie è i so sogni in giru à i fochi olografichi chì ballanu à u ritimu di e stelle.
Ma ciò chì hè più rimarchevule in u mondu di dumane hè l'energia chì alimenta tuttu : l'amore. A ghjente hà scupertu chì l'amore ùn hè micca solu un sintimentu, ma una forza cosmica, a più putente fonte d'energia, capace di trasfurmà i deserti in oasi in fiorisi è e lacrime in perle di gioia.
Allora, ciuccetta, sogna in grande è ùn ti scurdà mai chì u futuru hè una tela chì natu ci poie pinghje e to avventure. È forse un ghjornu mi dicerai cumu u mondu di dumane, cù e so meraviglie è i so misteri, hè diventatu a to realità, una pittura duve ogni pinnellu di a to imaginazione hà lasciatu una striscia chì ùn si pò squassà.