« Battlefield », le nouveau « Mahabharata » de Peter Brook

Peter Brook hà creatu u so Mahabharata in 85 in Avignon. Un’epopea di nove ore, u so capu d’opera. 30 anni dopu ne face unu più minimalistu d’appena più d’un’ora.

U Mahabharata, cum’elli dice l’indiani hè una furesta infinita, epopea d’una guerra gigantesca trà duie famiglie per u pussessu d’una cità oramai distrutta da l’acque di u Gange, una furesta travesrsata da favule palese, raconti segreti. Un puema longu quant’è quelli di a bibbia : 274 778 mila versi, un imensu contu di maravigli è di spaventi, scrittu trà u quatriesimu seculu nanzu à Cristu è u terzu seculu dopu à Cristu.

Perchè avè lu ripigliatu trent’anni dopu ? Peter Brook dice « Campemu un’epuca duve tuttu cambia. À volte isse periode di cambiamentu sò creative assai, l’alba d’una era nova è pusitiva, ma oghje seriamu piuttostu ind’a falata, tuttu sprufonda adipertuttu. St’alternanza di tempi di cunstruzzione è distruzzione hè u grande tema di u Mahabharata, secondu u quale a vita  di l’umanu si sbucina in quattru grande età. Oghje campemu in l’età di Kali, chì hè quella di l’oscurantisimu dopu à l’età d’oru, d’argentu è di ferru. Cumu fà per ùn vede chì a distruzzione hè adipertuttu, trà terrurismu, a guerra in Siria è e so cunsequenze tremende ».

Principia issa nuvella pezza à a fine di a guerra sterminatrice chì hà stirpatu milioni di guerrieri. Cum’è tutti i conti arcaichi a guerra hè nata d’una lita familiale : l’opposizione accanita trà i centu fratelli Kaurava, cundutti da u fratellu più grande, Duruhodana è i cinque cugini, I Pandava, cundutti dà u primunatu Yudhishtira.

I centu fratelli sò morti. Hà vintu Yudhishtira. « Cumu regnà ? Cumu truvà a pace quandu u campu di battaglia hè cupertu da tutti issi morti ? Cumu campà cun issu rimorsu chì vi rode l’anima ? » si dumanda Peter Brook.