Ducumentu
Isule Lavezi
![](https://interromania.com/sites/default/files/styles/image_548xx/public/i_lavezi.jpg?itok=4R53Qj91)
L’arcipelagu di i Lavezzi sariani sti sbrisgiuli di tarra chì finiscini a Corsica à u suttanu. I Ghjenuvesi chjamavani sti lochi : i carrugi, veni à dì u locu strettu trà mari è scogli di u passaghju, tantu chì francà i Bucchi di Bonifaziu custituisci da poi sempri un piriculu.
In cor di u XIXesimu seculu, Lavezzu entri in a storia di i grandi disgrazii marittimi di u Meditarraniu. U 15 di frivaghju 1855 dicini i Bunifazinchi chì timpesti cumpagni ùn aviani mai vistu, s’arrabbiava u strettu nantu à una magnifica fregata partuta da Tulò a vigilia par purtà 700 marinari à a guerra di Crimea.
Ghjunta à a punta di l’Aciarinu nantu à l’isulottu, u battellu si spundò nantu à i scogli è l’omini ùn pobbini luttà contr’à a forza di l’elementi, puri si a spiaghja si truvava vicinu vicinu. Manc’unu fù salvu.
Dui picculi cimiterii si poni sempri veda oghji nantu à stu locu di paradisu chì si pò mutà in infernu cù a vuluntà di u mari è di u ventu.
Duranti anni è anni, ci fù più morti chè vivi nantu à u Lavezzu. For di u guardianu di u fanali, qualchì piscadori chì ci pudia stà una sittimana o dui d’istati o u pastori chì vinia à fà pascia i prati verdi è saliti di u centru di l’isula, poca ghjenti ci stava.
L’arcipelagu sanu appartinia à una vechja famidda, I Tersian, chì u vindì in u 1959 à Castel, u rè di i notti parigini chì ci feci vena unipochi di people nantu à l’isula di u Cavallu, vicinu à Lavezzu.
In l’anni 70, à l’amicu Castel, li veni l’appitittu più grandi chì u turismu principia à intarissassi à a Corsica, cù a binidizzioni di u Statu chì ci vidi u solu mezu di sviluppu. Ancu di grazia in u 1969, Michel Leenhard hè numatu da a DATAR par fà nascia u Parcu Naturali di a Corsica chì sbuccarà in u 1972. Cù u sustegnu di u prisidenti Giacobbi, riesci à fà classificà l’arcipelagu. Fora di Cavallu, dighjà insiritu in un prughjettu turisticu. Sarà a parti sacrificata ed hè cussì chì a cumuna cumprò (par u francu simbolicu) l’arcipelagu è chì a prima riserva naturali fù creata in l’82 : a Riserva di i Lavezzi duvintata in u 1999 a Riserva naturali di i Bucchi di Bonifaziu.
Oghji l’arcipelagu hè di cunfronti à dui prublemi cuntrarii. Lavezzu hè francu d’ogni custruzzioni ma poni sbarcà più di 4000 turisti à ghjornu duranti l’istati mentri chì Cavallu, privatu è urbanizatu, difendi a so manata di migliardarii.
Ma a sapiamu dapoi a Sémillante : in sti lochi di sprafundu, u piriculu hè una permanenza di a storia.