Versione :
Corsu

L'ATTORE SECONDU M.P.DE MARI

U PARÈ DI UN'ATTRICE

U PARÈ DI UN'ATTRICE...

    M.P.De Mari porta una testimunianza pudente, diretta è senza avvinte. Hà participatu à duie creazione : Innò è Prima tù, in u 1982 è u 1983. Cunferma cum'è l'altri attori un’ evuluzione chì à pocu à pocu si impuculisce u testu in issu teatru, è quand’ellu ferma hè più pueticu, più à pezzi. Più incantatoriu, sinu à Prima tù duv’ellu si ghjunghje à a spressione ballata, è dopu, u travagliu cun Patrizia, ligatu solu à u cantu.

    Cuncentra a so intervenzione nantu à u fattu ch’elli eranu propiu una truppa. Parla in modu figurativu è dice "vulavamu", vene à dì ch’elli si rendianu capaci di tuttu l'attori, eranu cum’è una tribù, ci vulia à esse capaci di tuttu è ancu mette si in periculu. Dice cusì è si vede ch'ella accunsente cù u prugettu d'issu teatru, anni dopu... Una mossa cullettiva è persunale, nata cù issu travagliu duru, penosu è chì scatavultava l'esse. Dopu à issu travagliu ùn si pudia più esse cum’è nanzu. Dice dinù chì, à dispettu di l’idee chì correnu oghje, Teatru Paisanu ùn era sempre cusì prezzatu da i militanti pulitichi di l’epica di U Riacquistu. Dumenicu, dice ella, travagliava in a radicalità è in a pruvucazione è, puru in l’ambiente militante culturale è puliticu di l’epica, ùn eranu cusì pupulari issi teatrini custindi. S'ellu si và à circà, si scopre ch'elli avianu ancu una nomina pocu quenta. U so travagliu, a so spressione dava fastidiu à e cunvenzione di cumpurtamenti è di l’idee. Elli, chjappi in u so travagliu radicale è pudente, ùn facianu casu chì à i militanti, puru ch’elli fussinu presenti à i spettaculi, issa spressione li garbava pocu è micca. Suppurtavanu per militantisimu issa spressione troppu pruvucatrice, à parè soiu. Cunclude M.P.De Mari chì oghje, in a creazione corsa ciò chì manca di più, à puntu hè a pruvucazione!