Appughjendu si sempre nantu à l’insignamentu di issi dui maestri, Stalislavski è Jouvet porta più inlà a definizione di l’attore è mette in risaltu unepoche di dichjarazione di quessi custì :u teatru, misfidà si di u teatru: vene à dì ùn piglià micca e cunvenzione cumu s’elle fussinu verità. Parte da sè, ma scappa da sè stessu. L’attore principia sempre troppu prestu cù u sentimentu invece di parte da a situazione. Nantu à a scena ci vole à presentà a vita di u spiritu di l’Omu. Piglià cuscenza di quant’ella hè primurosa a presenza di u sguardu trà unu è l’altru è dinù quant’ella cumanda a presenza di a maghjina suciale. Sò tante pediche ch’ellu ci vole à sapè liberà si ne.