SPASSIGHJATE LITERARIE: “Santa Catalina”

SANTA CATALINA

Carul’Antonu s’hè fermu vedivu incù una zitidducia chjamata Catalina.

Solu ùn pudìà attiviscia à tutt’ i faccendi di a casa, è ci vulìa ancu à dà una mamma, frateddi è sureddi à Catalina.

Allora  pochi tempi dopu s’hè rimaritatu incù Ghirulmina, più vechja à chè eddu, pà via chì a tinta ùn pudia avè ziteddi.

 Quissi sò cosi ch’edd’ùn pudia capiscia Carul’Antonu , po scuraghjitu è malurosu, s’hè missu à vulè mali a so moglia, è pà ùn sì ò pà ùn nò, a tichjava di colpi.

 

Tandu Ghirulmina s’hè missa à vindicà si nant’à Catalinedda chì purtantu era cusì brava.

Pà truvà mutivi à minà la, li facia fà faccendi chì a zitedda ùn pudia attiviscia.

 

O Catalì, piglia issu stacciu è va’ à empia lu à a funtana.     S’è tù ùn  sè bona, pigliarè i colpi è in lettu senza manghjà ! »

-« Ma issu stacciu hè pienu di tafoni ! Comu possu fà pà empia lu ? »

-« Ùn m’arriguarda. Va’ è vidaremu. »

 

Ben’intesu a tinta ziteda ùn hà pussu empia u stacciu è s’hè miss’à pienghja.

San Ghjaseppu l’hà intesa è s’affacca :

-“ Parchì pienghji a me ziteda”?

-“Parchì mamma voli ch’e empii issu stacciu d’acqua ma hè impussibuli. È dopu m’hà da minà ! »

Dà mi quì chì u t’aghju da empia eiu ».

 

Ghjunta in casa incù u stacciu pienu, a matrigna ùn hà pudià creda ! Chì miraculu !

Ben’intesu, ùn l’hà pussuta minà issa volta !

 

U lindumani, Ghjirulmina dumanda à Catalina di lavà à u fiumu una camisgia, po di stirà la incù i so mani di manera parfetta, è s’eddu ci hè un piegu, li so prumissi i bastunati.

Catalina và à u fiumu, lava a camisgia, a faci siccà à u soli, ma quantu à stirà la, hè un’altra storia.

Si metti dinò à pienghja, è tandu affacca a Verghjini Maria :

-        « Chì ci hè a me ziteda ? »

-        «Ci voli ch’e stirghi issa camisgia di mani ma ùn possu ! »

-        « A t’aghju da fà eiu, è vidarè chì a to mamma sarà cuntenti . »

 

A panna fù stirata di manera parfetta è a brutta matrigna ùn hà pussutu dì nudda,  ma hà capitu chì pà pudè la minà, ci vulia à dà li una faccenda impussibuli.

Allora u lindumani a dumandatu à Catalina di piglià a rocca è di filà pezzi di legnu ;

 

-«  Si pò filà a lana, ma micca pezzi di legnu ! Comu possu fà ? O santa Verghjini, aiuteti mi torna ancu issa volta ! »  si lagnava piinghjendu a zitedda !

 

Eccu chì a verghjini entri in camara di Catalina è dumanda chì hè u mutivu d’issi pienti.

Devu filà pezzi di legnu pà ùn essa minata ! «

-« I filaraghju eiu » dissi a Verghjini !

 

Ghjirulmina hà cridutu ch’issa volta, era sicura di tichjà la di colpi !

Allora a’ filatu i pezzi di legnu comu t’aghju ditu ? »

-« Iè ! eccu un ghjumeddu d’oru ch’e socu ghjunt’à filà ! »

 

A  matrigna ùn l’hà pussutu suppurtà ! Di colpu issu dimoniu incalzunatu hà dicisu di tumbà à Catalina è pò basta.

Tempi dopu, Ghjirulmina si porta a zitedda à cantu di fiumu  è a lampa in un pozzu prufondu

È dopu  volta in casa currendu pà fà da manghjà.

 

Ma Ghjesù avia vistu tuttu ! Hà  salvatu à Catalina da u pozzu è dopu l’hà purtata in un cunventu, chì culà avarà una vita più felici .

 

A sera, Carul’Antonu cerca a so figliola è ùn la pò truvà. Cuniscia a cattiveza di a so moglia è s’hè dubitatu di qualcosa di funestu!

Induva hè catalina » ?

-« Ùn la sò eiu ! Ùn l’aghjù vista da sta mani’in quà ! »

-« À tè di truvà la subitu , sinnò ti strangolu in un mumentu ! »

-« Ma comu possu fà pà truvàla ? »

 

A brutta assassina faci neci di circà la è pò volta in casa .

L’hà truvata o nò »

-« Innò o Carul’Antò ! «

-« Socu ch’è tù ùn la po’ veda L l’avarè lampata in qualchì pracipiziu ! »

 

Allora u povaru babbu piglia à Ghjirulmina pà u coddu è a strangola. Ghjunt’a notti, faci un fossu in ortu è l’intarra bedda prufonda.

 

Dopu si metti in viaghju pà circà à Catalina ma pà nudda, ben’intesu.

 

Scuraghjitu, si mett’à pienghja, è tandu affacca Ghjesù chì li dumanda  u mutivu d’issi pienti !

Aghju persu a me figliola Catalina, è pensu ch’ùn la pudaraghju mai ritruvà !

    L’avarà tomba   a me moglia ! »

-« Ùn pienghja più chì socu induva si trova in bona saluta è felici. Ti docu issu ghjumeddu di filu  doru. Una volta liatu un capu  à issu castagnu, suvita u filu  è quandu sarà tuttu  scioltu, vidarè un cunventu. Culà si trova  Catalina ! »

 

Carul’Antonu suvita u filu d’oru è ghjunghji à u cunventu.

-« Pan Pan !

-« Quali hè ?

-« Socu u babbu di Catalina »

Una sora veni à ghjapr’ a porta è si rendini  in una piccula cappedda induva Catalina prigava.

 

Dopu tanti basgi  è pienti di ghjoia, Catalina hà cuntatu à u so babbu tutt’ i turmenti dati pà a so matrigna,  è di chì manera hè ghjunta quì purtata pà Ghjesù .

Hà ancu dittu ch’edda vulia sta quì,   in issu cunventu induva si truvava felici è senza strazii.

 

Si pò capiscia chì Carul’Antonu ùn pudia chè dì chè sì. Catalina hà campatu quì tant’anni, è vechja vichjona, sempri prighendu, fù cunsidarata pà tutti com’una santa.

 

Santa Catalina ?  Di sicuru, si parla di a stessa parsona !