Capu di a vetta

Ci ne stemu torna à pena in issu bellu rughjone di Balagna. Oghje avemu da attippà sin’à u prumuntoriu chì permette à u sguardu d’avvinghje u golfu sanu di Calvi, i puntali di a serra centrale è di ciuttà l’ochji in mare da a banda di mezu punente. Di prima si cammina pianu nant’à una pista larga è po’ dopu ci vole à piglià un chjassu ch’ùn stà tantu à attippà è à scuscicà trà unepochi scogli varii è chì certi parenu tuttu andati stretti. Dopu ghjunti quassù, à settecentu è trè metri sopr’à u mare, cù a croce maestosa è bella stragliata ci hè un librettu duv’ellu si pò scrive duie parolle di ricordi. Hè chjamata “Croce di l’Austriachi” è ramenta chì tempi fà alpinisti d’issa naziunalità sò stati i primi à cullà quassù, è cusì scrive issu nome in a memoria culettiva.