Harpalionu era un sameri chì  truvaia chì a so vita ùn era tantu garbata, incavizzatu à l’accortu in issu prati pocu erbosu d’ i parti di Vizzavona .

 

Allora si missi in capu di cambià di locu è circà di fà furtuna .

 

Eccu chì strappa a so cavezza è si metti à corra in la furesta. In i prati ch’eddu scuntrava, l’arba era sapurosa è ancu i cardi si lacavanu manghjà.

 

Harpalionu, di cuntintezza, si metti  à runcà cusì forti ch’un lionu, chì facia  a so siesta, fù svigliatu di colpu !  Ma chì accadi ? Qual’è issu musicanti cusì maravigliosu ?

 

Vulendu si renda contu, u lionu sbocca in u prati è vedi issu animalu più chè bizarru, cusì ùn n’avia mai vistu !

-« Comu ti chjami ? »

 - Harpalionu » hè u me nomu chì voli di « sopra à u lionu »

 - Sè dunqua cusì forti par essa sopra à i lioni ?

 - Più chè cusì !  Sò più forti chè tutti l’animali d’issa terra.

 - Allora femu una cosa : mittimu ci inseme tù  è eiu, è saremu sopra à tutti l’animali.

 - Socu  d’accusentu, amicu lionu. Andemu pà issu mondu è femu li veda quale no semu ! »

 

Eccu chì si mettini in viaghju.  U camminu era longu, u soli d’aostu spampigliulava, è  assitti era ni, ma dopu à Vizzavona, sott’à i calapitus si prisintò un fiumu !

 

U lionu si feci una grossa bita è po in trè salti,  eccu lu da culuandi à u fiumu.

 

U sameri ùn pudia chè nutà pà fà ni altr’è tantu,  ma ùn era  praticu è manca pocu ch’edd’ùn s’anneghi !

- « O Harpalionu, ùn sà micca nutà ? N’a’ missu tempu ! »

- Eiù ? Notu megliu chè un pesciu. Un’ a’ vistu chì tamanta  anguidda s’è attacata à a me  coda,  è mi ni sòo vulsutu sbarazzà. »

 

Benchè stunatu, u lionu a s’hè criduta.  È ni partini, ma eccu chì un muru si prisintò, ch’u lionu ùn stà tantu à francà.  Ma pà Harpalionu era un castigu : ùn pudia dì « Comu fà , o cumpà, incù i me schinchi secchi, m’aghju da truncà u coddu ! »

 

Allora, ùn ci hè storie, bisogna à pruvà. Alza l’anchi è à forza di fà,  ghjunsi à metta u corpu nant’ à u muru,  ma si truvò in piriculu, à quandu pendi in daretu, à quandu in davanti….

 

- « Allora, o Harpalionu, chì aspetti pà falà ? Mi pari ch’è tù mi a’ taruccatu,  è ch’ùn sè bonu à nudda !

 - A dici tù ! Nemancu !  Ùn vedi chì prufittu di a situazioni par veda si u me davanti pesa più  chè u me daretu. « 

 

È po si metti à arpià, à pittarizzà, chji chì ti chjachi  ghjunsi à falà d’issu muru.

 

Ma u lionu avia capitu ch’u sameri ùn era più forti chè tutti l’animali !

-« A ripetu vulinteri ch’è tù sè un baciardu,  ch’ùn sà fà un o di canna ! 

- Allora o sgiò lionu, femu una scumissa : u prima chì sarà capaci di lampà issu muru in terra, è vidaremu quali hè u più forti da tè à mè ! »

 

Tandu u lionu  si metti à sgranfignà incù i so ugnoni ma u muru tinia bonu ! Nudd’à fà !

 

-«Prova tù o cumpà è vidaremu à ciò ch’è tù sè bonu ! »

 

Tandu Harpalionu si metti à  arpià,  calcitteghja cusì forti  u muru, è ghjunsi à lampà lu in terra in pochi mumenti !

Allora u lionu  ùn pò chè ricunnosce :

 

-«  Mi cridiu u Rè di l’animali , ma tù sè più forti ch’à mè !

- È ancu ùn a’ micca vistu tuttu !! Possu fà ancu megliu ! i vedi issi cardi cusì secchi pieni à tanchi? È bè sò capaci ancu di manghjà li ! »  è si metti à manghjà i cardi.

 - Quissa po allora, a mi cupiarè ! Dumani faremu una cunsulta  generali  è faremu  di tè  u Rè  di i tutti  lioni ». 

 

E cusì Harpalionu divintò Rè, è tutt’a so vita, fù unuratu è assistatu comu si devi pà tutti i lioni.

Di più, eddu ùn dumandava mai à sparta a manghjuscula d’issi bestii, chì carri ùn ni manghjava ! Un Rè disintarissatu !!

 

Ma Harpalionu invichiaia,  è una mani, u truvetini mortu longu tiratu in a so stadda reali.

 Hè statu pientu anni è anni pà i lioni è ancu oghji, si sentini i so lamenti in la furesta di Vizzavona.