Versione :
Corsu

GOLU

Una canzona pupulare assai chì move piacè, emuzione è pensà

Ghjurnata di u 4 di Ghjugnu di u 2013 in Corti à u Centru Culturale Universitariu.

 

Scola di Quinta A di Moltifau.

Cù a participazione di i cullegianti :

Acquaviva Dorian
Brun Mélanie
Bzikot Quentin
Colombani Julien
Cotte Axelle
Luciani Anthony
Luciani Mathieu
Manenti Laurina
Mattei Antoine
Moracchini Estelle
Pasquier Angèle
Puggioni Laetitia
Rabhi Ikram
Sammarcelli Pierre Paul
Seva Marina
Thibou Héloise
Vesperini Pierre Antoine
Zeboudji Kilam

Prufessore : Francesca Colombani.

GOLU

Monte Cintu mi dà è friscura è purezza
Falgu salti saltendu da teppa à cutalone
Sò u fiume sò Golu di fole è di passione
Ma pocu à tè ti preme o Senna à tè fiumone.

Trà scippali è strittoni sboccu in la scala santa
Quassù l’altagna in volu quaiò a pescia lesta
Ci si colla in Niolu à pregà o fà festa
Ma pocu à tè ti preme o Senna a mo gesta.

I mo ponti in u tempu Ponte Altu è Ponte Novu
Purtavanu i passi di i mo figliuloni
I toi ci sò ghjunti cun fucili è cannoni
Ma pocu à tè ti preme sò ne portu lu dolu.

E meie e fiumare sbarsanu u so lagnu
In una foce turchina mare mediterraniu
Ci si pesa u sole cum’è à u primu ghjornu
Ma pocu à tè ti preme o Senna u mo sonniu.

U mo sonniu di corre da Monte Cintu à mare
Cantendu a canzona di chì m’hà fattu fiume
S’ellu ci hè un dumane di pace à meze scume
Parlà ne inseme o Senna parlà ne fiume à fiume.

G.T.Rocchi- F.Travaglini

 

Bonghjornu à tutti.
    Simu a scola di quinta A di u cullegiu di Moltifau . Simu felice d’esse oghje, quì, cù voi à u C.C.U. U nostru prufessore hè Madama Colombani. Vi avemu da prisentà u travagliu che no avemu appruntatu nantu à a puesia : Golu. Passu avà a parolla à i mo cumpagni di scola ( Mélanie BRUN).
    GOLU hè una puesia scritta da Ghjuvan Teramu Rocchi è cantata da Felì nantu à u discu : E nove. Sta puesia hè un umagiu à u fiume u più longu di Corsica. Golu parte da A Paglia Orba , in Niolu , è và à sversassi in mare , à a Marana ( Anthony LUCIANI).
    A puesia hè cumposta di cinque strufate. I so versi sò longhi. E so rime sò o abbracciate o si seguitanu (Marina SEVA).
    In A PRIMA STRUFATA, u fiume Golu si prisenta. Parla cume una persona . S’addirizza à A Senna, u gran’fiume francese. Li dice da induve ellu vene è ch’ellu hà ellu dinò una storia (Ikram RABHI).
    A SECONDA STRUFATA : Avemu quì , a strada fatta da l’acqua , parte da l’alte muntagne corse , traversa U Niolu è si ne fala in ghjò, versu a piaghja. (Axelle COTTE).
    TERZA STRUFATA:  In issa strufata , u pueta ci rammenta a storia di A Corsica è i prublemi tra u nostru paese è A Francia. S’addirizza dinò , sempre in l’ultimu versu , à A Senna per dì li ch’ellu ùn hà micca i listessi pinseri cà ellu è mancu u listessu campà ( Pierre Antoine VESPERINI).
    QUARTA STRUFATA. U fiume Golu ci parla di i so lagni è di i so sonnii. Ghjunghjimu quì in mare , hà finitu a so falata da e muntagne à a piaghja. Dice à A Senna , in l’ultimu versu, ch’ellu ùn hà nunda à fà di e so sperenze (Julien COLOMBANI).
    QUINTA STRUFATA : Golu dumanda à A Senna , à u fiume francese ma dinò à i rispunsevuli francesi , di tene contu di e brame di I Corsi è di A Corsica. Golu dumanda ch’ellu si possi sempre parlà , discorre è regulà i prublemi in a pace è a serenità (Laurina MANENTI)