AFRICANU

· AFRICANU
Case di piottuli, di fanghe
È tondule cum'è i forni,
Cù e so' porte senza stanghe
È l'astrachi ch'ùn anu scorni,
I pastori di a savana
Magri quant'è u so' bestiame
È criampuli per la piana
Chì si torcenu da la fame.
Ultime fiure d'un paese
Di u to' campatu mischinu,
Spessu piacatu da l'offese
È cunduttu à maldestinu.
Ma ti ne vai !
…..U mughju rogu di a nave
È l'urli di u maremossu
Discetanu l'anime schiave
Invece, stranu paradossu,
Sunnieghji di casamenti,
Torre di vetru è di lume
Mentre chì i to' pentimenti
S'affondanu nentr'à e sciume
È e gocce d'acqua salita
Chì ti pizzicanu lu visu,
Cù qualchì lacrima sbuccita
Ammachjanu u to' surisu.
È t'alluntani !
Prestu cù ventacci friscogni
È boschi è campi più verdi
Accusterei i to' sogni
Senza sapè ciò chè tù perdi.
À termine di u viaghju,
Chè tù volsi fà cù gran' pressa,
Qualchì cità furmiculaghju
Ti parerà terra prumessa.
Ma un oceanu di ghjente
Ti serà di pocu cunsolu
È cù a tristezza criscente
Ti senterei sempre solu
È più luntanu !
Si a metà di u to' core
S'avvezza à l'aria urbana,
L'altra ùn tricherà à more
Patendu ciò chì t'alluntana.
Cum'è d'altre persone sole,
Sempre in cerca d'un appoghju,
T'accuncerei, senza sole,
Cù a schersìa di l'alloghju.
U to sognu di paradisu
Aspessu ti serà infernu
È à circà qualchì surisu
Ùn truverei ch'è u schernu.
Indè tè cuntava per pocu
Ma, pè ciò chì t'era, ti stimu.
Altrò, fattu lu to' traslocu,
Ùn serai, forse, più nimu
Tù l'Africanu!
Sappia ch'ùn basta u tramutu
Pè discioglie tutte le trave
È squassà l'òrridu vissutu
Di e generazioni schjave. 
Benchè tù sìa trapiantatu
Nentru à un novu terricciu 
Ti serà sempre ramintatu
Chè t'ùn sì ch'è un ghjunghjiticciu.
È spessu, pè salamaleccu,
Da l'albore fin'à e stelle
Ti lamperanu u rimbeccu
Pè u culor' di a to' pelle. 
Ùn si dumanderanu mancu
Si sott'à una pelle scura,
Uguale à quella d'un biancu,
Si pò spannà l' anima pura.
Di l' Africanu ! G.P.RISTORI