« Una ghjurnata sventurata in Corti ! »

        A storia si passa u primu di dicembre, a neve cupria tuttu, eru aggrizippita. Ed eru ubligata à andà in corsu !

Pigliu a vittura, ùn smarrava micca, era troppu cutrata, mi socu dettu : « avà comu aghju dà fà ! ». Pocu à pocu u veiculu smarra, cumenciu à vugà, era 8.30 aviu largamente u tempu pà arrivà in corsu à l’ora.

Di colpu a vittura hà fialatu nantu à u cotru di u catramu, eru insigunita. Mi so ritruvata à meza strada, ùn ci era mancu un fiatu, nimu nimu, socu surtita di l’ardignu, ùn aviu nunda, grazie à Diu. Fighjulu a vittura chì ella t’avia un calzarota cripatu ! Chì sdiccina !

A prima cosa ch’aghju fattu hè di chjamà à qualchissia ma paria fattu à posta, u telefonu ùn passava micca ! Felicemente u me babbu m’avia amparatu à scambià i pinò. Pigliu u criccu à nantu à u cascione è cumenciu à fà cullà a vittura, era assai difficiuli ! Bon, quandu era in l’aria, svitai i vitamappuli, unu à unu, ci n’era quattru. U pinumaticu surtitu, cercu a rota di ricambiu, ma rota di ricambiu ùn ci ne era ! À stu mumentu quì mi socu pizzicata, pinsendu sunnià, ma eru bè svegliata !

 « Ùn hè micca pussibuli ! » aghju mughjatu, è in più ùn ci era sempre nimu, ùn era micca nurmale, si passava qualcosa oghje in Corti, eranu 9 ori, a vittura devia stà quì ed eiu deviu andà à studià, aviu un esamine à 9 ori 30. Decidu di parte à pedi, u ventu è a neve eranu ghjacciali, t’aviu i mani, i pedi è a faccia cutrati. Ci era à pocu presu quindici minuti di marchja. Mi socu dettu chì chjamaria u spannatori da l’università. A timpesta impighjuria, eiu avanzavu pianu pianu, ùn vidiu guasgi nunda cù a nivata.

À un mumentu, vecu una spezia d’umbrata à qualchì metru di mè. Più m’avvicinavu è più l’umbrata ingrandava, mi vinia a paura…

Sintiu rumori inquietanti, avanzava quantunque chì l’ora passava, era dighjà 9 ori 10 !

Sta ghjurnataccia ùn era micca a meia, ùn era accadutu cà disgrazii. Avà eru impaurita da sti brioni chì venianu di frontu à mè. Socu stata curaghjosa è socu partita currendu in u ghjelu, sculisciavu, cascavu ma ùn vuliu micca piantà parchì t’aviu troppu à pauru di a « bestia », ùn sapiu micca ciò chì ghjera !

Di colpu aviu sintitu nantu à i me spalle, un pesu, cum’è sì qualchissia m’avia chjappata ! Aghju cuminciatu à mughjà cum’è un’anima dannata, à pienghje, mi cacavu sottu !

Eru aggrippata, ùn pudiu più move, po ùn à socu micca cum’è aghju fattu, ma aghju giratu a testa è aghju vistu chì ghjera una semplice branca chì mi tenia !

Riesciu cù dulori à discioglie mi ne. « Uffa ! più paura cà male ! », mi socu dettu dopu à st’aventura periculosa.

M’avvicinnavu di l’università, ùn eru più cà à una centinaia di metri, eru cuntenta, parchì ùn eru micca in ritardu, ghjera 9.20.

Ghjuntu ch’e fui in u campus eru fiera d’avè fattu tuttu stu parcorsu di u cumbattante. Vocu in à facultà, ùn ci era nimu, « pò esse semu dighjà rientrati», aghju pinsatu.

Socu falata sin’à a me sala di corsu è « paffu ! » in lu scaleghju socu cascata mi socu ritruvata à corpu insù.

Sintiu una voce di più in più forte chì dicia : «  Céline, Céline, arrizzatti ! »

Quandu aghju apartu l’ochji, aghju vistu a me amica Mariana chì mi dicia « spiccia ti chì ùn semu micca in avanzu ». Ùn capiscia più nunda,  ma ghjè sicuru, mi socu subitu arritta, aghju basgiatu à Mariana chì si dumandava si ùn eru micca scema è li aghju dettu : « O Marià aghju sunniatu, aghju sunniatu !»

« Prepara ti avà ! » mi dicia Mariana.

Mi socu peparata in quattru è trè sette, è semu falate à a me vittura.

Inghjò, entriamu in u veiculu, è pruvavu à smarrà, ma a vittura ùn smarava micca !

Allora mi socu annarbata, aghju mughjatu : « U sunniacciu ricumencia ! Oghje socu maladetta ! ».