L’OMU VERDE

Albiana/CCU 2012
Cullezzione Calamaii
184 pagine
Furmatu : 15 x 21 cm
ISBN : 978-2-8241-0300-6

Strattu

Assai attirati da a visione di l’arburu gigante, assai incantati da u lume chì imbucinava u locu, i dui arrivanti novi passonu una bella stonda à distingue quellu esse nudu à pusà nantu à a petra à u pede di u pinu maiò.

I dui pulizzeri avianu ascultatu cun curiusità è attenzione a storia di Lucca sopra a so scuperta strana, ma secondu ciò ch’elli avianu ritenutu di e so parolle, issu omu era statu abbandunatu custindi è ùn li paria ch’ellu ci fussi alcun mutivu per crede ch’ellu era unu sminuitu di cerbellu o qualcosa d’issu generu. Eranu di più per pensà chì un omu nudu à mezu à una furesta era pussibile ch’ellu fussi unu à piglià u sole, o allora un hippy o un persunagiu particulare un pocu freak esercitendu si in una certa spezia di ritu, di liturgia orientale o vai à sapè chè, è ùn ci era nisun mutivu per andà in a furesta à scumudà lu.

Quatra di cuprendula
Trà e publicazione recente di Fonoll (Lleida) ci hè El collidor de vesc de Pau Urgell, un agente di e fureste, natu in u 1971 in Les Borges Blanques in Catalogna. Hè u primu rumanzu d’issu scrittore di puemi, prosa puetica è nuvelle.L’opera conta cumu, dopu à a seconda guerra mundiale, un giovanu sulitariu è stranu, ghjunghje in a furesta di Sant Gregori. Campa vendendu legne, frutti salvatichi, funghi è viscu. Un ghjornu, piglia è si infocia indrentu à issa furesta bughja è sbocca in un locu duv’ellu ci hè un pinu tamantu. Maestosu è spaventosu... Ùn si dubbiteghja mancu à pena chì tutta a so vita, è l’avvene di l’umanità si anu da truvà cundiziunati da a storia d’issu scontru magicu è... maleficu?
L’omu verde, adattazione d’issu rumanzu in corsu, piglia radica in un imaginariu cumunu è una vuluntà di fà una fidighjata nantu à quistione primurose di u nostru tempu. In più di una storia piacevule, chì undighjeghja trà realisimu, maravigliosu è fantasticu, una di e letture pussibule unisce umurisimu è satira. L’abusi di e religione duminante è a dinunzia ridicula di cumpurtamenti pretesi religiosi in certe teurie presentate cumu prugressiste sò per l’autore un sugettu propiu suchjosu è una campa pè u lettore. È po, u so pocu è tantu di riflessione, ùn li manca à issu libru.