Hè esciutu da pocu un scrittu interessante è significativu di qualchì tendenza di a literatura corsa di stu principiu di u vintunesimu seculu. Significativu per via ch’elle ci si trovanu intricciate tematiche, parè è riferenze in quantu à a vita oghjinca di a sucetà cù a so dimensione corsa, a cultura è i varii prublema cum’elli sò risentuti da un’osservazione attente. Interessante è di garbu, ùn ci saria mancu da dì la chì u parcorsu literariu di Guidu Benigni face vede quant’ella pò esse fruttifera a primura di scrive chì move in una persunalità duve a relazione individuale à a Corsica si incontra cù u cumunu à issu puntu. Hè per quessa chì in tutta l’opera soia, è ad ogni filare di stu libru novu u cuntestu isulanu intreccia è inghjenna l’imaginariu literariu. À chì si ciutterà propiu in a lettura ci truverà a Corsica sana, di sempre cù i so mendi, i so prublemi, i so sciali è i so valori. È po, cun frizzione è penseru, a Corsica di dumane. Benigni hè d’issi scrittori chì sanu purtà à riflette, è à pensà prufondu, senza discorsu pisiu nè dugmatisimu. A so cunvinzione è a so visione di a vita ùn si ponu spiccà da a so manera di dì, u so stile. À quandu ridiculu, maliziosu o scherzosu, à quandu malinconicu o puru tragicu, mai u parè si stacca da a dicitura literaria. Una passighjata in a so bibliugrafia a face vede subitu subitu. L’estru variu è largu di Benigni hè sullicitatu in tutte e so cumpunente è ind’è stu rumanzu esciutu avà, una bella parte di u garbu in a lettura vene da chì da u pensà seriu o pueticu à a satira è a dinunzia, sò issi soni diversi à cumpone u ritrattu di una sucetà è di un territoriu sputichi, belli è degni, ma minacciati propiu di sparisce. U lettore a puderà vede è verificà lighjendu stu Ostrisorma esciutu in u 2014 è a so prima versione quì, ind’è a rubrica “Literatura” di www.interromania.com