Per riflette appena…

I NON-DETTI

Quante rilazione d’amore, d’amicizia è d’affare sò sacrificate per via di a nostra paura di cumunicà ?

Quanti non-detti lascemu entre in a rilazione, puru sapendu benissimu chì ogni non-dettu porta in ellu a sumenta di a rumpitura ? Perchè chì averemu tantu paura di parlà di chjarisce è di pone e questione bone, di sente a verità è d’aghjustà a nostra cumprensione mutuale ? Chì peccatu d’aspettà d’ùn pudè più vultà si ne per dì si, infine, ciò ch’è no amuntemu dapoi mesi, anzi anni !

Certe cose sò difficiule à dì perchè chì avemu a paura di perde a rilazione s’è no parlemu. Parlà è ascultà sò prove d’amore, puru quandu u messagiu hè difficiule. Ci hè un mondu di sferenze trà stà zitti per ascultà è stà zitti per via di a paura di parlà.

Eppuru, quand’è no ardimu INFINE à dì e cose vere, ci rendimu contu chì l’amore veru, l’amicizia vera è una sincera rilazione sò fatti per superà a verità, mentre chì morenu, per u più, cù i non-detti.

Ghjè avendu u curagiu di dì e cose ghjuste chì saperemu s’è a rilazione ch’è no vulemu prisirvà hè autentica. Ghjè stendu zitti chì a stuffemu à pocu à pocu.

S’è no ci tenimu à ‘ssa rilazione, osemu à parlà. Tenimu ci cari abbastanza per dì  “l’affari veri”, ancu e cose difficiule.

S’è ‘ssa rilazione ùn sopravive à a verità, hè ch’ùn era autentica è chì si duvia spenghje di tutte e manere.

Passu di u libru di Diane Gagnon « Apprendre à s’aimer, un jour à la fois ».

• Amà si sè stessu, perchè chì hè cusì difficiule è per duve cumincià ? 

Amparà à tene si caru pare tantu difficiule… Eppuru, a nostra capacità à esse felice hè direttamente prupurziunale à a nostra bon’opinione di noi stessi. Una mancanza di stima di sè hè unu di i peghji castighi di a nostra sucetà. 

Per via d’una opinione pessima di sè, omu risente ghjelusia, invidia, zerga, insecurezza, ùn ardisce à principià scambii pusitivi per sè stessu perchè chì ùn si tene micca abbastanza caru. Per via d’una opinione pessima di sè, ùn ardisce à dumandà, nè à affirmà si, tulera l’intulerevule per troppu tempu. 

L’amore si  pò piattà ancu daretu e piccule cose di u cutidianu, si piatta daretu à e bravezze ch’è no ci femu o chì ci sò fatte. L’amore hè ancu in l’ascoltu attenziunatu di l’altru ma prima di sè, in i picculi gesti. L’amore si piatta induve solu a ghjente attente è ricunniscente u pò vede. 

Hè sempre stunente di vede chì a cumunicazione hè di più una preoccupazione assai feminile. Tandu ci pudemu dumandà perchè chì e donne ùn cumunicheghjanu micca (nantu à i so piacè, i so sintimenti…). Ùn hè più a pressione d’un patriarcatu oghje  struttu, ùn hè più a pressione d’una sucetà psicorigida (quandu tutti i medii si cuntentanu di dà u cambiu di u sessu direttamente o indirettamente), sò spessu e donne elle stesse, prigiunere di e so cuntradizzione, di i so pricuncetti chì si ne stanu nant’à a difesa più o menu agressiva è preferiscenu piattà si daretu à una bugia circuspetta piuttostu ch’una verità chì l’ingageria nantu à una via induve li tuccherebbe à emancipà si curagiosamente versu una strada nova, forse spaventosa. 

Parlà, cummencia per sè stessu è micca per fà parlà à l’altri stendu li à sente saviamente mentre piattemu accuratamente i nostri pensamenti è desideri.

Ma a stima di sè ùn ci vene micca cusì una matina : amparà à tene si caru hè u travagliu d’una vita sana è si cunstruisce ogni ghjornu per via di picculi gesti per sè stessu.

Issu testu hè dedicatu à tutti quelli ch’ùn si sanu amà à u cutidianu è chì si scordanu di fà di elli stessi u rigalu di u cele ch’ellu duveria esse è stà ogni ghjornu…