A Corsica face parte di l'isule più grande di u Mediterraniu. Ma di pettu à e so surelle maiò cum'è a Sicilia, a Sardegna o Cipru hè assai menu pupulata, forse per via di u so carattaru geograficu assai muntagnosu.

Da isula, ùn hè tanta penalizata da e distanze cù a " terra ferma ". Hè situata in u golfu di Genuva è a custera taliana li vene solu à centu chilometri. Chì osinnò, l'isula si gode un locu abbastanza centrale in u " mare nostrum ", ciò chì spiega e diverse influenze culturale è linguistiche durante a so storia marcata da invasione multiplice è da ogni latitudine.

A storia di l'ultimu milleniu hè corsa principalmente da trè tempi : u tempu pisanu, quellu genuvese è infine francese. Ma da l'antichità à u medievu, l'isula cunnosce i grechi, i rumani o i sarracini, per indettu. Di sicuru, tutti sti passeghji ùn stanu micca senza lascià una stampa culturale è architetturale chì mette propiu a Corsica à u centru di u Mediterraniu.

Culturalmente, hè cunsiderata mediterrania occidentale. A lingua corsa, per indettu, face parte di l'aghja italo-rumanza. A lingua, elementu centrale di l'identità affirmata di l'isula, face parte di l'emergenza rumanza chì pone in giru à e rive nord di u mediterraniu l'inseme di e lingue di matrice latina (più maiò o più chjuche) chì noi cunniscimu oghje. In u frattempu, u corsu si farà unu cù e diverse influenze, e principale essendu quella tuscana poi, da dui seculi, quella di u francese.

Al di là di sti particulari, a mediterraneità di a Corsica si ritrova in parechji altri criterii. Carattari genetichi, valori è raportu à l'altru, cucina, panni, usi cumunitarii è religiosità. Oghje, malgradu un'occidentalizazione forte à livellu di l'evuluzione glubale, a nova immigrazione inserisce torna l'isula in u mediterraniu sud postu chì a Corsica accoglie cumunità magrebine è purtughese impurtante.

Marcà a risposta ghjusta / e risposte ghjuste
Cochez la ou les bonnes réponses

Ci sò sbalgi. sbalgiu.
Pruvate la dinù clicchendu quì sottu. Bravu, hè tuttu ghjustu!
» Fà l'eserciziu un'altra volta