Una volta fatta quessa a passighjata, ùn si pò cullà più insù in Corsica. Di fatti Monte Cintu hè a cima più alta di Corsica, à 2706 metri.

Puru s’ellu ùn sarà u più bellu sia pè a cullata sia pè a vista, quantunque stu meritu l’hà : esse u puntu più altu di l’isula è cusì porghje una certa fiertà à tutti quelli chì a li provanu !

S’ella ùn hè affascinante issa stinzata à l’insù, vi si ferma quantunque à mente. Hè à piccu, ùn ci hè un sprichju di virdura, hè dura !

Si parte da Lozzi in Niolu (ci hè un altra via pè a valle di L’Ascu). U megliu hè di andà in vittura (ci vole un 4X4) sinu à u rifugiu di Petra Pinzuta subitu à l’alba. Da custindi, omu si pò appichjà ver’di u “Santissimu “. In una vintina di minuti, si ghjunghje à u rifugiu di l’Ercu, duve à iss’ora custì quelli chì ci anu passatu a nuttata aprenu solu un ochju.

Alè, eccu ci in ballu pè l’ascensione è hè propiu a parolla chì ci vole! In un’ora si colla 600 metri nantu à i 1300 annunziati, à mezu à un petricaghju chì squillisce è ùn ci si trova un filu d’erba.

Prestu prestu u paisaghju hè diserticu. Ad ogni girata quellu chì marchja intuppa nantu à un altru muru da passà. Spessu spessu ci vole à aiutà si cù e so duie mani da cullà è spessu spessu fà l’arretta è fighjà in daretu da rimette si capu à cosa ellu si pò assumiglià un filu d’erba. O nanzu da fighjulà quella maraviglia di u lavu di Calacuccia ch’ellu spanna u sole. À pocu à pocu spuntanu dinù l’elpali à l’intornu.

Parechje ore d’issa marchja spurtiva è ripetitiva ci portanu in cima. À manu manca si vede A Paglia Orba.

À u pede di a croce chì insegna u puntu più altu, si vedenu a Rivellata è Calvi. Più vicinu, i resti di u lavu d’Argentu è a valle di l’Ascu cun dinù a stazione di skì chì hà turnatu à apre in u 2015. A vista hè bella ma menu panuramica chè nantu à u monte Ritondu.

Vultendu, si pò fà un giru pigliendu u chjassu chì ghjunghje à u lavu di u Cintu. Falendu “basta” à saltà da un petricaghju à l’altru è lacà si sculiscià nantu. Ma femu casu, micca s’è vo site principiante in a marchja di muntagna!

U lavu di u Cintu, d’un turchinu bellu è stranu, è à l’ombra d’una rocca tamanta, pare persu à mezu à un crateru di petre smisurate. L’acqua hè piana è calma è ùn si batterà chè da tuccà cù a punta di e dite quant’ella hè fresca, chì ùn ci vole à indebulisce ne l’ecosistema.

Si face più faciule a seconda parte di a falata. Longu à i cairns ùn si stà tantu à ghjunghje nantu à un chjassu in vista chì ci porta dirittu à u rifugiu di l’Ercu.

Per istrada, bellissima surpresa: eccu trè mufre chì sboccanu da a machja è si facenu piglià in ritrattu!