U MEDICU STRANIERU

Scontri di 16.11.2012

“ U Medicu stranieru ” hè stata creata in u 12 di aprile di u 2001, à u Teatru di Furiani dopu à una residenza teatru chì hè stata urganizata da l’Associu corsu di l’IITM, u CCU, a cumpagnia U Teatrinu è a Municipalità di Furiani. Hè statu l’attu primu di una cuuperazione corsusarda chì hè crisciuta in modu regulare dapoi tandu.
L’attore Mariano Corda (Cagliari), ch’è no cunniscimu dinù cù e so messe in scena è a so arte per fabricà mascare, sculture è altre custruzzione artistiche hà interpretatu u rollu di Josè Ramos.
Hè ellu u medicu ebreiu, accusatu di magia è cundannatu da l’Inquisizione per via ch’ellu avia guaritu à Graziosa, una giuvanotta ammalata si durante u tempu di a Passione duv’ella facia a parte di a Madonna è malgradu l’avisu di i medichi cristiani chì a cunsideravanu persa. L’altre parte, e facianu quelli di u Teatrinu : Francescu Berlinghi (u babbu), Ghjuvan Battì Filippi (u vescu), MA.Geronimi (a serva), Ghjuvan Petru Giudicelli (u prete), Curinna Mattei (Graziosa), è l’allevi di a Scola di u Teatrinu. Claudio Sanna (associu CALIC, Alghero) avia fattu a musica. I custumi è i mascarimi l’avia curati Simona Grimaldi, i lumi è a regia William Garnier è Ghjulia Allione a cumunicazione cù a stampa. Guidu Cimino, digià più chè cunnisciutu da u so talentu di attore accerta custindi u so sapè fà di mettore in scena. Di fatti tutta a scenugrafia è l’evuluzione di i persunagi sò stati tantu più riesciuti chì issu travagliu custì hè statu fattu in qualchì ghjornu solu. I spettatori presenti pè issa creazione anu fattu festa à tutti quelli chì anu datu di manu à issa bella rializazione è chì Radio Corsica Frequenza Mora avia riunitu pè a so emissione di “ Mediterradio ” (settimanale trà e radio di Corsica, Sardegna è Tuscana).
Fù tandu l’occasione dinù di almanaccà un prugettu di cuuperazione cù Gabriele Benucci di a cumpagnia livurnese “ Theatralia ” chì era ghjuntu à vede a prima di “ U Medicu stranieru ”. Una pruspettiva cuncretizata dopu in parechje creazione interregiunale è in particulare I prugrama EX VOTO è MORES

 

 

Visionner la vidéo