Versione :
Corsu

U VIAGHJU

un testu scrittu trà Patrizia è Ghjacumu

FATE VI UN VIAGHJU CUN PATRIZIA GATTACECA….

L’ultimu spettaculu di Patrizia GATTACECA vi porta in aviò, sopra à Puretta, à u mumentu di atterrisce. U pilotu a si allonga una cria è gira per sopra à u rughjone, passendu sopra à i paesi d’issi cuntorni. L’ottessa si attalenta à fà passà u tempu u megliu ch’ella pò…
È tandu chì face ? Conta fole, stalvatoghji è puttachji, da fà ride à sbillicà si è po ancu riflette (ma pocu !). L’intenzione èhè di passà si una stonda. Issu spettaculu, Patrizia, u face in interazzione piena cù u publicu.
Truverete quì un pezzatellu di una serata propiu riesciuta fatta fin’di nuvembre in Oletta…
Ùn fate casu s’è u filmettu trimuleghja ognitantu. Chì vulete ? In aviò casca chì u ventu fessi trinnicà tutu, ùn hè vera?7


U VIAGHJU

In aviò cun Patrizia GATTACECA

Entre à capavanti nant’à a scena, cumu s’omu l’avessi lampata…

Scusate, merà, ma avà propiu avà, ùn mi ci aspettava. Mi avianu riclutatu cusì, quasi per riempiimentu. Per fà mi piacè. Ma l’hôtesse si hè venuta male chì hè incinta è ùn la sapia micca, è si hè imbarcata senza fà casu. È avà, à vulè o à ùn vulè, tocca à mè tocca. È mi ci vole à recità a lezziò!
Simu ghjunti in Puretta. Ùn staremu tantu à calà ci è à atterrisce. A temperatura in pianu hè di 30 gradi… Sò assai 30 gradi, neh ? Ma a Corsica, o ghjente, a Corsica hè a Corsica! Vulete dopu, cù una temperature simule, vulete ch’ella ùn ci colli mica in capu? Dopu, si capisce ch’è no faccimu n’importa chè ! Pensate una cria, ci cacciate una decina di gradi è cambia tuttu : menu passione per l’elezzione, menu ghjente ammursciate, chì a si piglianu pè a male pè ùn sì o pè un nò, è invece di caccià a pistola è stirpà mezu mondu di rabbia per via di una parolla di traversu è cambia tuttu : si posanu, si contranu, si arrangianu è, ùn ci criderete micca, ma si invitanu ancu à cullaziò : « Allora, hè detta ? Ci contu ? Vi affaccate dumenica à cullaziò? Innò, innò, aiò, lasciate corre, chì pacu eiu ! Vulerebbe vede ancu quessa vulerebbe ! Sò eiu chì vi aghju parlatu male, è avà mi ne pentu ! Innò, innò, mi ne pentu, è vogliu riparà ! » (da a culissa, si vede una manu chì face cennu è prova à attirà l’attenzione, ma ella ùn vede)
È què, solu s’è vo ci cacciate 10 gradi. Capu più fretu, cumpurtamenti più misurati. Ghjente assinnata, ragiunevule… Je vous en prie… Après vous… Ùn face nunda ça ne fait rien…

Ma gradi, s’è vo ne cacciate di più chè 10, tandu ùn rispondu più di nunda. Cù a temperatura ci vole à fà casu. Si pò ottene ancu risultati strani è qualchì volta ancu catastrofe. Bon ! Site andati digià à caccia à u cignale ? A sapete in chì statu è vo site è ciò ch’è vo risentite, è issu pizzicu ch’è vo avete quì, à u core, sentendu a machja chì trizineghja è ch’è vo videte ch’ellu si avvicina a bestia. Allora tù, stringhji u ceppu di u fucile. A bestia è papà ! una fucilata è casca seccu ! Tamanta bestia ! Un maschju chì face omancu centussessanta chilò !
Ma s’è vo mettite dece gradi in più, hè un lione chì vi si affacca è capite ùn hè più listessa cosa ! Tandu ùn sò s’è e chevrotines videte, s’elle bastanu… (in a culissa, listessi cenni, à pena più insistanti chì provanu à attirà l’attenzione, ma ella ùn vede nè sente)

Allora pensate s’è invece di aghjustà li i gradi, è bè s’è vo i cacciate, tandu face u fretu, ùn hè vera ? È cù u fretu, cridite mi puru chì ùn ci surtite à bè cù u cignalottu ch’o dicia prima, o puru cù u lione chì u disgraziatu, in a machja corsa, cum’ellu ùn hè micca praticu è ch’ellu si hè persu è ch’ellu gira dapoi una quindecina di ghjorni senza manghjà, aghju a paura ch’ellu ùn vi possi mancu scorre, aghju a paura… Innò, cù i gradi in più, saria quasi per dì, meza bastunata… Innò, s’è vo i cacciate, mettimu, ùn la sò, ingiru à zeru gradu a metà di l’annu, vi cambia tuttu vi cambia… Riflettite una cria. A vi pudete figurà a Piazza San Niculà in Bastia, a Piazza Porta in Sartè, U Diamante in Aiacciu o a Piazza Paoli in Corti ? Tandu, a ghjente chì face u passa è veni è u colla è fala tutta a santa ghjurnata, cridite ch’elli anu da esse tali è quali cum’è vo i vidite oghje, fieri è diciuloni chì rifacenu u mondu è l’elezzione municipale cù e so chjachjare chì ùn ne finiscenu più? Innò, sò in bande sì, ma sò cambiati. Marchjanu cusì, cù e so mani cusì di latu per tene l’equilibriu, zuppichendu è inciampendu, pocu sgualtri à marchjà nantu à piazza è carrughji chì sò più pratichi à nutà ind’è l’acque cutrate d’issi paesi di u Nordu chì solu u so nome vi mette u cotru à dossu.
Dunque I nostri vechji à a ritirata, a nostra ghjente cara, tutti quelli chì si spasseghjanu l’Acque d’Orezza è pratecanu l’arte di Michelassu –manghjà, beie è andà à spassu, cacciate li vinti gradi di temperatura è diventanu subitu subitu tanti …pingouins! È a nostra bella Corsica, a trasfurmate in una pianura ghjalata chì pare tuttu u Groenland !
Senza cuntà chì voi, ch’è no avemu lasciatu quallà, cù u fucile incruccatu è u batticore chì galoppa cum’è un cavallu furiosu, vi videte spuntà mica u cignale tamantu cù e so sane bianche è currendu à rotta di collu, innò, nè u lione famitu ma fiaccu, smuntu, esauritu, innò, vi si affacca l’Orsu biancu, tamantu cum’è un bancu di ghjacciu è chì vi feghja cun l’ochji crudeli è sgrignendu I so denti acuti cum’è pugnali. Innò, ùn scappate mica, ùn vi svenite mica, ùn mughjate mica. Ùn temite nunda chì simu quì sopra à Puretta, chì à mumenti avemu da atterrisce è chì fora, à st’ora quì face ingiru à 30 gradi di temperatura. D’altronde… (si vede torna qualchissia chì vole fà cennu, sta volta ella si interrompe, girata ver’di a culissa… hè impenserita… stà à sente, è po ripiglia…)
Ah ! Troppu longu ? Sò troppu longa ? Mi l’allongu, eiu ? (ammursciata) Bon ! bon ! Và bè ! Basta à dì mi la! Possu fà ancu cortu, sapete, s’è vo vulete Tagliu à l’accorta ! (azeza) Puretta… ghjunti… tuttu bè !... trenta gradi… un caldu chì si crepa ! Oh ! Aiò, o ghjente, pigliate mi sti pacchetti è isse valisge è scappemu, chì eiu ùn aghju micca chè quessa da fà !... (ironica) …. Ah innò ? Troppu seccu, troppu rapidu, troppu scrianzata ? Ci vole à sapè ciò ch’è vo vulete chì in fatti… tuttu ciò ch’o sò, nimù u mi hà imparatu ! Quandu parlu hè di stintu… A cumpagnia ùn mi hà micca nè furmata, nè riclutata per parlà à i passageri. L’hôtesse, a sò fà, ma ùn aghju micca amparatu…
A possu fà « Classe Grand luxe », s’è vo vulete : l’avete digià intesa, ma a vi rifacciu ch’è vo capissite duv’ellu hè u mo livellu, quand’ella mi pare à mè !
« Mesdames et Messieurs….


(si interrompe chì si hè avvista chì l’aviò avia trapassatu u terrenu di Puretta)
Oh oh oh ! Ma chì mi face u pilotu ? Hè scimitu di un colpu o hà betu ? … Ùn simu più in Puretta ! Simu ghjunti in Bastia simu ghjunti ! U tippu hè scemu ! Induve vulete atterrisce in Bastia! A cita hè incagnata trà u mare è a Serra di U Pignu! Anu u so da fà à stà ci l’abitanti, ùn si pò fà entre un punterolu in cità ! Ùn capiscu micca ! Sarà intuntitu di un colpu ! State à vede : avà sì chì simu freschi ! Ci anu da rifà u colpu di « Y a-t-il un pilote dans l’avion ? » -Eh non, y en a pas y en a ! O piuttostu, y en avait mais y en a plus !... Anh ! innò ! Ùn hè micca scimitu… In quantu à mè, ci sarà qualchì festa in famiglia è hà dettu : « Fighjate u celu à tal’ora precisa, vengu è vi facciu mottu »… Sarà a festa di a moglie sarà, o allora l’anniversariu di a ciuccia è li hà prumessu di vene à fà li cennu à l’ora precisa ch’ella hè nata ! Vi la dicu, u tippu hè intuntulitu à veru ! (di un colpu l’aviò si mette à trinnicà è ella intrampuleghja) Oh ! ma hè longa ? Ùn hè ancu finita a cumedia ? ! (rivene a calma è ripiglia l’equilibriu) Vi pare à voi ? Avete capitu induve sò cascata ? Si hà modu à scumbatte è à circà : i scemi sò scemi è Bastia… hè una bella cità :

Anh, bon ! Simu ripartuti ! Ùn staremu tantu à atterrisce stavolta quì… Furiani … Biguglia… Borgu Lucciana … Casamozza … Aiò chì femu torna ? Eccu quant’ellu costa un capricciu di un minutu ! … Avà, di sicuru, ùn si pò micca falà à l’asseccu !... Casamozza… Monte … Olmu … Stà à vede chì à mumenti simu in Aiacciu simu ! Mì mì mì: simu sopra à a Castagniccia… Sò I mo lochi… I mo lochi cari… Mi ci sò allevata è ci voltu sempre. Videte, u mo paese hè quì. Penta Acquatella. Cara… E mo delizie…
Fighjate u paese cum’ellu si stende quì, da a Penta à L’Acquatella, i dui paisoli chì si basgianu dopu guardatu si in bisbò in tempi antichi.
Simu intelligenti è cultivati, tutti quanti. Quelli di L’Acquatella à pena di più chè quelli di A Penta, ma ùn circhemu gatti à pilà! Ùn hè micca per dì, ma quì, ancu l’animali sò intelligenti. Ùn li mancu chè a parolla à certi ! È ancu, s’o pudessi parlà, sò sicura ch’è vo stariate à bocca aperta da ciò ch’o vi vuleria cuntà ! Ma, acqua in bocca, chì isse cose custì sareste ancu capaci à pensà ch’elle sò fole, ch’elle sò !
Ma fighjate quì… A videte issa casuccia cù a piana verde verde ghjustu davanti, vicinu vicinu à u castagnetu chì si accarezza è ingutuppa u paese sanu ? È bè, quessa hè a mo casa. Hè custì ch’o sò nata. Hè custì ch’o campu. Sè vo fighjate bè, ghjustu davanti a casa ci hè cum’è una fiama rossa chì passa è chì vene nantu à u verde di a l’erba… È bè, quessu hè Fiamone. U mo canucciu… U mo canucciu caru. O s’è vo sapissite cum’ellu hè caru… Certe volte, quand’ellu mi feghja cusì, fissu fissu, cù i so ochji dolci dolci, è ch’ellu mughja pian piapianinu cù e so vucichjule piene d’amore, a sapete chì mi sentu strughje ? Pare ch’ellu mi vulessi parlà, pare… Iè, pare… Tenì, vulete ch’o vi facci una cunfidenza ?... Vulete ch’o vi palesi a verità ? Hè un secretu ! Site capaci à tene un secretu ? Hum ! Ùn la sò s’o mi possu fidà…Iè ? Innò ? … Alè, tantu peghju per mè s’è vo mi palisate ! A vi dicu… Micca nunda, ma dopu tutti anu da dì chì Patrizia hè bugiarda, ch’ella ne inventa è ch’ella ne trova chì sò sprupositi ! Ma bon, avà mi pare ch’o mi sò troppu avanzata è ch’ùn possu più fà marchja in daretu ! Tantu peghju per mè ! Mi amparerà ! A prossima volta, s’è a mo lingua parla, ch’elle mi caschinu e mani, ‘lle mi caschinu ! È bè, sappiate chì u mo cane Culombu ùn hè micca cum’è l’altri ! Hè un cane chì parla ! È chì mi dice tuttu. Videte, ùn sò micca una puttachjona, ma s’o vulessi cun tuttu ciò ch’ellu vene à cuntà mi, possu mette u focu in paese è po in tuttu u rughjone. A ghjente credenu di fà la franca è di fà i so affari à l’appiattu, ma ellu, u mo cursinu, u mo Culombu carinu, è bè, tutte e sere, vene è mi palesa tuttu…. Innò, innò, ùn insistite micca chì ùn diceraghju nunda. A sola cosa ch’o possu dì, hè di cuntà vi certe cose ch’ellu li piace più chè u restu è chì ci facenu ride à sbillichera. Mi conta i stalvatoghji, veri o inventati -pocu impreme- ch’elli anu l’abitudine di cuntà si i cani quand’elli si trovanu cusì è ch’elli ùn anu nunda à fà…
Tenì, una corta corta, per vede….

Hè un bulldogu forte, sapete di quelli furzacuti, cù u musu cusì massicciu, è u nasu schjacciatu… Corre, passa, vene salta è si ne techja… è a si ghjoca cusì davanti à un casale Piazza San Niculà in Bastia. Di un colpu pesa u capu è vede, à u primu pianu, un schizzettu di caniche fine fine, pettinatu è infiucchittatu, ma chì u feghja cù un’aria trista chì li face male… Allora u bulldogu si sente empie di cumpassione pesa u capu è dice :
- Ti annoi chè ? Alè, fala quì, veni chì ci emu da campà !
- Ùn possu micca, sò chjosu in casa ! dice u caniche.
- È chì pò fà, o scimò, piglia è salta da u balcone !
- Ah quessa po innò ! Poca primura di avè u musu inciaccatu cum’è tè!

Hè bella neh ? Ne vulete un’antra ne vulete ! Quessa hè à pena più… intellettuale diceremu…. Hè una storia di cane pulizzeru.
Hè un berger allemand chì lighjendu u giurnale hà sculinatu una piccula annunzia chì dicenu chì cercanu un cane pulizzeru pè esse impiigatu à u FBI. U cane riflette. A pulizza… ùn li piace tantu di esse di a pulizza, ma à la fine, dopu riflessu una cosa è l’altra, piglia è si decide. Allora si presenta à a Direzzione di e Risolse Umane di u FBI è ghjè ricevutu da u Direttore di u Persunale. L’omu ùn li face tante belle manere chì hà un candidatu chì li hè statu ricumandatu, allora prova à scuragisce lu, è li dice :
- I nostri agenti hè capita ch’elli devenu avè u nasu, ma micca solu. Ci vole ch’elli appiinu dinù cumpetenze assai in parechji duminii. Tenì, prima di tuttu, dite mi s’è vo sapete pichjà omancu 50 parolle in un minutu. U cane ùn face nè una nè duie. Piglia è si cala davanti à l’ordinatore è invece di 50, li stuppuleghja più di 70 parolle in un minutu !
U direttore hè stupitu, ma ùn la face vede è li dice :
- Ci hè dinù una prova fisica. Ci vole à saltà l’ostaculi. A vi sentite ?
Ùn hà ancu finitu di dì la chì quellu cane hà compiu tuttu u percorsu di l’ostaculi è in un tempu chì hè un sprupositu...
U direttore hè stumacatu è li dice :
- Bon ! Ci hè un’altra cundizione fundamentale. Hè un testu di lingua. U FBI, pè issu postu, hà bisognu di un agente bislinguu…
Tandu u cane u feghja è po li cappia :
"Miau, miau, miau"

Sò tremendi, issi cani, sapete. Sò intelligenti. È certe volte, i patroni si ne accorghjenu… Questa quì ch’o vi aghju da cuntà avà, hè accaduta à un parente di u mo cane Culombu. Hè un cane astutu, ma à pena troppu… spuntaneu, diceremu. Issu cuginu di Culombu stà in un baru ch’ellu tene u so patrone quì, in Corti falendu pè a Sculiscia. Hà chjappu l’abitudine di fà si una partitella anch’ellu quand’ella casca. Allora un ghjornu affacca un furesteru in caffè è di sicuru stà cusì impalaficcatu videndu u cane attavulinatu cun l’omi è chì stinza e carte cum’è l’altri. U tippu si dumanda induv’ellu hè cascatu, s’ellu hè svegliu o s’ellu sunnieghja. Piglia è si indirizza à u patrone è li dice cusì, nici nicione, cumu s’ellu fussi nurmale:
- Và bè, o amicu, u vostru cane, a maneghja ! Mi pare ch’ellu si sbrogli più chè bè mi pare?
È tandu u barman cappia:
- Micca tantu innò ! Quand’ellu hà un bellu ghjocu, issu tuntacciu rimena a coda !

Un antra di u cuginu di Culombu è po più, hein, chì à mumenti simu ghjunti !
A sapete chì à mè mi piacenu i filmi? Festivale di u filmu talianu, festival di u filmu spagnolu, festival di u filmu inglese, festival di u… bon ! tutti i festivali i mi sciaccu è po, in settimana ci vò una o duie volte. Allora una sera ch’o mi era purtatu à Culombu, u mo cane mi dice :
- U mo cuginu hè solu, u ci pudemu purtà cun noi ? O Patrì, ùn ti face nunda ?
-Pensa à pena, à u cuntrariu. Ùn ci hè nisun prublema, À u Studio in Bastia accettanu ancu i cani, accettanu ! Basta ch’elli si tenissinu bè !
- Ah ma per quessa ùn ci hè penseru. Hè appassiunatu pè u sinemà talianu è cunnosce tutti i filmi cultes. Ti dice a distribuzione, u nome di u rializatore, s’ellu hè statu ripigliatu o s’ellu ci hè statu una sola edizione, duv’elle sò cunservate e bubine uriginale, via sà tuttu sà ! U poi mette presidente di u Festivale o puru di a Cinémathèque regiunale à a piazza di Landron in Portivechju !
Allora, và bè, simu andati tutti è trè è po u filmu –ùn mi arricordu più qualessu- u filmu hè principiatu ed eiu capite ch’o era curiosa di vede e reazzione d’issu cane… spezialistu di u sinémà Art et essai. È durante tuttu u filmu, u cane oh ! mi hà maravigliatu ! Ùn vi pudete figurà. Era stumacata era : u cane reagia esattamente cumu s’ellu capia u filmu. Quandu u giovanu muria è chì a so innamurata pianghjia, issu passagiu vi facia vene u piantu. È bè, u cane figurate vi ch’ellu era tristu. Una tristizia discreta pè ùn scumudà à nimu in a sala ma eo, à cantu u sentia chì si lagnava sottu voce. È po in i passi ridiculi, è bè u cane, torna custì reagia cumu s’ellu capia : ridichjulava è si campava in modu ritenutu. È cusì durante tuttu u filmu. Spettatori simuli, astuti , cultivati è distinti, ùn sò s’ellu ne hà tanti René Viale, u patrone di u Studio !
U fattu si stà chì eiu, era tantu ammasgiulata ch’o ùn aghju micca seguitatu u filmu. Mi paria mille anni di pudè capisce interrughendu u mo cane Culombu. Allora li aghju dettu :
- Site stupendi, in famiglia. Tù, parli cum’è l’animali di e fole è ellu ùn sò s’ellu parla, ma interessà, si interessa ! È si interessa à veru. Cumu s’ellu capia u filmu. Si lagna quandu u filmu hè tristu, ride quand’ellu ci hè da ride è trema quand’ellu face a paura. Hè tremendu issu cane, u filmu pare ch’ellu li sia propiu piaciutu.
- Micca tantu ! U libru, mi hà dettu ch’ellu li hè piaciutu di più !

Stuti, merà, tutti astuti in u mo paese. A ghjente ùn si ne parla ! È videte, sò sicura chì s’è vo fate un sundasgiu, è bè, hè propiu in L’Acquatella ch’è vo truverete i capizzoni micca solu struiti, cun bacchi, licenze, tese è ipotese è tuttu u restu, mancu persone assinnate, chì sanu fighjulà ogni stonda di a vita cum’ella và, è dopu riflessu è parlatu inseme, ne caccianu, cumu dì ?... una spezia di saviezza chì vi allumineghja a strada di a vita, à voi è à tutti quelli chì ne ricevenu l’insignamentu murale è… lentu a parolla ghjusta, l’insignamentu filusoficu ! Iè, in un certu modu, si pò dì chì in L’Acquatella, avemu, dapoi sempre, a nostra UNIVERSITÀ ! Videte s’è vo passate in piazza è ch’è vo fussite pressate, passate in furia è passendu in furia à cantu à a furtuna murale di a vostra vita ! Invece… s’è vo rallentite u passu, fate un picculu salutu discretu è vi calate à pena scantatu, in manera à un sgenà i savii, ma à pudè sente a so parolla, tandu sì ch’è vo ne tirate tuttu u suchju, tuttu u fruttu, tuttu u prò !
Custì, pusati nantu à e teghje lucchiche è ferrigne di quellu muru anticu chì serra A Piazzà, ci sò ELLI ! Posanu è pensanu, ma pensanu è parlanu !

Oimè, u tempu passa passa è eiu diciuleghju… Mesdames et Messieurs, et puis les demoiselles aussi, à mumenti ci simu. A temperatura in terra hè di 30 gradi. … Sò assai 30 gradi, neh ? Ma a Corsica, o ghjente, a Corsica hè a Corsica! Vulete dopu, cù una temperature simule… Merda ! Avà scrochju torna… Innò, solu per dì ch’o ùn mi scurdessi di nunda. Una : a ghjente : duie: A Penta Acquatella, veculu di tanti talenti è di tanti ingenii maiò ; terza : l’animali : i cignali, i lioni, l’orsi bianchi ch’o dicia… Anh ! Mi sò scurdata di e vaccine chì senza vacche, ùn ci hè più vita à paesi in Corsica. Senza vacche, chì faranu i giovani in i nostri paesi ? L’hà detta unu l’altru ghjornu à RCFM, nantu à u forum a matina, ancu u SECB dipende s’elle ci sòe vacche o s’elle ùn ci sò! Hè à pena esageratu forse, ma mica troppu… Dicia ellu chì I supporters di u SECB sò I paisani chì falanu pè i macci in Furiani, allora s’elle ùn ci sò più e vacche, ùn ci hè più supporters, macci ùn ci ne hè più, è u SECB ùn hà più chè da andà à fà si leghje. Dunque, micca vacche, micca prima à a vacca, micca prima micca travagliu, micca travagliu micca vita pussibule. I caffè chjodenu, e scole dinù, l’eppisserie ùn ne parlemu, Golu li vene u piantu è a piena di e so lacrime trasonda per sopra u so fiuminale, Monte Cintu si ne fala in pianu, e nostre muntagne altiere è fiere s’applattiscenu cum’è u casgiu frescu cacciatu da e fattoghje è lasciatu à u sole… Bon ! Tagliu à l’accorta è dicu à tutti : « Simu ghjunti in Puretta, speremu ch’è vo avete fattu un bon viaghju è ch’è no vi rivideremu nantu à e ligne di... » (si interrompe chì risponde à u telefonu)….Iè, d’accordu, li dicu… iè i facciu pazientà.
Allora, eccu Mesdames et messieurs, è ancu mesdemoiselles, simu ghjunti in Puretta, ùn ci hè prublema. Tuttu và bè, ma ci hè un picculu contratempu… In fatti, piove chì ne fala è ùn si pò avvicinà di l’aerogara s’è u carru ùn vene micca à circà ci. Ùn hè nunda ma a st’ora quì, u sciuffore di u carru hè digià andatu à dorme è si hà purtatu via e chjave di u carru. Ùn vi inchietate, a cumpagnia hà mandatu à unu à circà lu in casa chì a st’ora quì, l’omu hà prevenutu chì ùn risponde à e telefunate. Allora, mi dice u sceffu di aeruportu chì ùn starà tantu à vultà è mi dumanda, in u frattempu, di fà vi passà una stonda in canzone…..