A u punente di u  paese di u Viscuvatu ,quassù à a Punta di u Chjusone, ,induv’ella  nasce  a surgente  « L’Acqua acitosa Merciana » : si piatta una grotta un pocu misteriosa.

Oghje, suvitendu un chjassu muntagnolu,  pudete scopre  un ciottu scavatu in a teppa,  chjosu da vechje petre .

Ziu  Simone, u nostru vechju amicu pastore, ci cuntava  chì, tempi fà , in sta grotta  stava « u Gubacciu » .

« Era un veru  locu d'infernu !.....Un ghjornu,  un furesteru girandulava  è cuntemplava u circulu magnificu  è u circondu  di u Viscuvatu; l’omu s’era avvicinatu da a grotta. Stancu, s’era messu à u frescu à l’intrata  per ripusà si. Subitu, s’era affacatu,  zuppichendu, un nannulu  goffu cum’è u peccatu :  avia un capone  cupertu di capelli longhi è grisgi, era ghjambestortu cù sgranfiate à i pedi. e so bracce eranu assai corti è e e so manoni eranu pilose. 

U mostruosu parsunagiu grugnulò durante una stonda, po  cù una risaccia è alzendu a voce, li disse : « Quì , si nantu à mè, ghjè u mo territoriu ! Oramai, t’aspetta un casticu per avè pigliatu un chjassu periculosu.

…..Ti propongu di sceglie a manu chì ti minara : a manu manca o a  manu diritta. ! Spicciati »

        A mancina era fasciata, a diritta era una piola. Spaventatu, u furesteru  avia sceltu a mancina.

Ma, u gubbacciu ùn facia micca a sfarenza trà e duie mani, è, u povaru omu ricevò una piulata.  Po, u gnomu  s’avia purtatu a so vittima  à u fondu di a grotta.

Ziu Simone narrò un altru fattu accadutu à  un zitellu viscuvacchese  di 12 anni ; curiosu, Carlu vulia  sapè  ciò chì si passava in a grotta di u Chjusone. Dunque, un ghjornu, s’affacò à a dimora di u Gubbacciu.

U gobbu , annarvatu , d’esse scumudatu, scimiscia, è po, cù a so risaccia, è alzendu  a voce  li disse : « Quì , si nantu à mè, ghjè u mo territoriu ! t’aspetta un casticu per esse statu bellu  arditu ! Ti propongu di sceglie a manu chì ti minarà : a mancina o a diritta. ! Spicciati »

 Carlu designò a manu diritta, quella fasciata. Ma u zitellone, malignu , è lestu cum’è u ventu, u pigliò à petrate è l’acchjappò in capu.  U nannulu perse u so equilibru, è, cascò . Stu mumentu fù fatale : a piola di a so manu diritta li tufunò u corpu.

U locu induv’ellu hè mortu u Gubacciu, si chjama, oramai  « Palu di Ferru »