A FATA INNAMURATA

 

Fù un tempu chì i bestii aviani a parola, i petri marchjavani, Fati è Maghi ni faciani à pedi è à cavaddu, è ancu u diavuli facia di i soi.

 

Tandu in Guargualè c’era una Fata chì si chjamava Matalena. Era dinò una Maga famosa, è in più d’essa bedda come u ghjornu, era brava è aiutava tutti quiddi chì aviani bisognu. Ma campava sola in una sapara è avaria vulsutu truvà una cumpagnia .

 

Un ghjornu ch’edda passighjava in a furesta, scontra un pastureddu chì mirava i so pecuri, Era tantu  beddu è ghjucava cusi bè di a caramusa chì a nostra Fata s’innamora di colpu !

 

-« O pastureddu, comu ti chjami? Sè cusì beddu ! d’induva sè ? »

-« Mi chjamu Lisandru è socu di Urbalaconu. «

-“Sè di sicuru felici incù i to pecuri ?”

-“Iè chì sò felici »

-« Comu mi trovi ? Socu una bedda donna ? »

-« Di più bedda ùn ni pò asista nant’à a terra » !

-« Mi piaci u me pastureddu, è vulariu marità mi incù tecu ? Chì ni pensi ? »

-« Saria pà mè un piaceri mai vistu. »

-« Allora eccu un’aneddu in oru. Metti lu subitu à u ditu è saremu marit’è moglia. »

 

Cusì feci, ma appena missu l’aneddu, u pastori si trova di colpu vistitu di seta cusgita d’oru, come un Pincipu !

-« Avà veni incu mecu,  Socu una fata è aghju quì vicinu un carrozzu  trascinatu pà dui cavaddi alati, è partimu inseme. »

-«  Cara signora, senza vulè vi casticà , avariu bisognu  di dui ghjorni  pà

     andà à rigulà i me affari è basgià a me mamma, chì sara felici di sapè ch’e m’aghju da marità. «

-« Sò d’accunsentu ma dui ghjorni, micca unu di più ! T’aspittaraghju quì è andaremu in u me beddu palazzu . »

 

Lisandru, vistutu da Principu,  si metti nantu à u carrozzu incantatu è ni parti, ma prima di ghjunghja in Urbalaconu, à l’incruciatura di a Masina, eccu ch’eddu scontra una Regina chì piinghjia pusendu à fiancu di a strada, è chì li faci mottu.

 

-« Truuuuu o Bucchisgiò »

 I cavaddi piantani è Lisandru si barca  pà veda ciò ch’hè accadutu à issa bedda donna.

 

-« Beddu Principu, t’aghju da dì u me turmentu. Socu a Regina d’issi lochi. U Rè u me maritu  hè mortu è mi trovu sola. Vi vuleti marità incù mecu ? Una Regina ùn pò stà sola ! »

 

-« Umbèh ! Eccu una dumanda strana ! Comu fà ? Aghju prumissu à Matalena, chì hè centu volti più bedda, ma incù quissa Regina, eiu saraghju Rè. » Si dici Lisandru. A causa hè subitu intesa !

 

-« Iè ! vogliu bè essa u vostru maritu ! »

 

Ùn avia finitu di parlà chì di colpu hè divintatu u pastureddu ch’edd’era prima, vistitu di vechji panni.

A sò faccia hè divintata tutta vizza è era allora malu com’u piccatu ! Di più, u carrozzu è i cavaddi alati incantati  aviani sparitu.

 A regina hè tutta stunata ! Chjama i so servi :

-“Qual’hè issu mostru ? Ch’edd’andessi in zinefrica !” 

-“Hè u vostru maritu, o Regina!”

-« Cusì malu, u me maritu ? Mi pari ch’è vo siati cechi ! deci bastunati è purteti lu via ! »

 

A Fata Matalena hà vistu è intesu tuttu ! Ùn valini una baiocca nè unu nè l’altra.

 

-« V’aghju da fà veda qual’hè socu ! »

 

Allora di colpu si senti trimà a terra, si scatenani i soniti, l’accenditi, è a terra si aprì sott’à i pedi di a Regina è di Lisandru chì sò frumbulati in infernu.

 

Hè cusì ch’eddi si vindecani i Fati.