DA VEDE A VIDEÒ, CLICCATE NANTU À U LIGAME 

Pour accéder à la vidéo, cliquez sur le lien ci-dessus. 

Era bastatu pocu…

Hè vera, pocu pocu… Ci simu avvizzati tantu à a bellezza splendida di i nostri lochi ch’è no risichemu sempre di ùn vede li più propiu cum’elli sò Hè perciò chì l’artisti pittori è pueti anu sempre avutu una respunsabilità tamanta ogni volta ch’ellu ci hè vulsutu à apre ci l’ochji. I ritrattari dinù elli, è tantu più da chì u numericu è a manera sparta per tuttognunu anu fattu ammanita per qualsiasi ochjighjata di stintu a pussibilità di agguantà si un zinzicu di bellezza . È l’artistu sdi un colpu hè statu fattu rispunsevule di più. I paisaghji di l’Altra Strada ci ne hà datu a cunferma lampente ad ogni pagina panoramica. Cum’è tanti altri Filippu Pierangeli avia pussutu pensà solu à incantà ci. Ci pudia ammasgiulà ci pudia… A galleria duv’ellu ci porta ci pone, ad ogni pagina ch’omu gira, à l’orlu di l’abbagliulime. Ritratti, instantanei, pitture, sognu. Era bastatu pocu ch’è no caschessimu ind’è issi viaghji maravigliosi di solu a cuntemplazione. Ma stu prugettu era propiu un’altru affare…

Iè, pocu pocu. A nostra ghjente pè u più sò cusì ligati cù u so rughjone o à ciò ch’elli ci facenu chì u sguardu squassa nantu à e so facce i lineamenti di a so identità d’individui. U dissegnu di un mistiere dettu tradiziunale tandu si pone stampatu sopra à a persona reale. L’attitudine, u modu di tene si, u vestitu è sinu à a spressione di u sguardu di solitu portanu a mstampa di qualità prufessiunale ch’omu aspetta è pensa di truvà. Tandu l’osservazione storce u ritrattu è u face mascara di u tipu pretesu è scioglie i tratti di u visu è a singularità di l’attitudine. Ciò chì palesa u lavuratore, u calzulaiu, u vignaghjolu o u pastore piatta a personna stessa ch’omu scontra, unu chì stà quì, un cameratu o l’amicu fidatu. U nome, u stalvatu, una scopa chì tronca o un frusciu in a filetta è po più nunda. Ma quallandi, ùn sarà micca qualchì fantasima di Mérimée chì si ne và ? In a mitraglia di tutti quelli chì almanaccanu guide è miti, u sguardu veru si malfida di l’etnotipu è di a messa in venduta di ciò ch’ellu vede. Ci vulia un’altra via… L’altra strada.

Iè, à a ventura di L’altra strada li piace à passà rente à issi periculi. Si face u so chjassu trà issi dui precipizii duv’elli falanu i paisaghji è a ghjente subitu ch’elli sò rapresentati. U furmatu panuramicu di l’album, l’alternanza di i ritratti, l’ogetti, e sarre, l’infiniti è i piani da vicinu ; u scandaglià di e mani, a frutta, i capi è e fiare mette di fronte e cose, i siti è l’omi. Quindi, in u mondu di Pierangeli, u petrificà di l’acque, venti è muvimentu, di tuttu ciò ch’è no t’avemu intornu ne face un tempiu duve si palesa a vita cù i so gesti è parolle di primura. Ciò chì ne esce ùn sò isse parolle cunfuse cum’ellu disse u pueta di e currispundenze . Sò nanzu sguardi, dinù è dinù, è a granitula ci và da a petra à a manu, da a farina à a terra, da a vita sin’à a vita. U sguardu ver’di l’eternu