CRACUVIA 

Cracuvia hè più chjuca è podasse menu cunnisciuta chè Varsuvia, a so surellona pulunese. Ma quantunque  Cracuvia  si merita ch’omu a ci si allonghi una cria à visità la. Insturchjati ingiru à A Vistula, a cità è u so centru storicu di garbu ùn ne mancanu è si tenenu in sè veri tesori. Di fatti, cù a so storia diviziosa, Krakọw sgrumbuleghja e so bellezze da purtà ci da l’epica medievale sinu à un’epica cuntempuranea menu aggarbata. A piazza di a Merria face u batticore di a cità,  adurnatu da a catedrale Santa Maria ch’omu ricunnosce faciule per via di e so torre dissimetriche è a so maraviglia anconica rifazzulata pocu fà.

In issu centru, li danu l’anima i caffè è l’osterie chì inquadranu a piazza. Più inlà, u Castellu di Wawel ramenta u splendore di u regnu di i rè di Pulogna. U quartieru ghjudeiu d’issa cità ramenta l’ore più scure di a storia mundiale, hè impurtante di arricurdà si ne. Visitendu e cullezzione di i principi Czartoryskich si dà un tonu più lebbiu à e scuparte, u tempu di salutà a Donna da l’ermina di Leunardu da Vinci chì a so grazia l’hà in core à u palazzu. À una qundecina di chilometri di Cracuvia ci sò e saline stupende di Wieliczka, sfruttate dapoi u tredecesimu seculu. À più di centu metri sottutera hè stupendu di scopre cappelle, lavi nascosi è sculture fatte da l’operai. A gastrunumia tradiziunale o più muderna ùn stanu  micca indaretu è venenu à fà più sublime, s’ellu ci vulessi, issa parte di a Pulogna.

Ritratti : 

1-turtelle à a cannella

2-Piazza di u Marcà, piazza medievale più maiò di l’Europa

3-Unu trà i guardiani di a tottra di a merria nant’à listessa piazza

4-Figura santa in a chjesa più vechja di a piazza

5-À e porte di a storia

6-Vista di l’inseme di u castellu Wawel, domiciliu di i rè pulunesi

7-E belle surprese di a cucina pulunese

8-Ancona tamanta di tigliolu chì rapresenta a vita di Maria

9-Tettu di a nave centrale di a basilica Santa Maria

10- Porte di a bimah di a sinagoga Remuh, quartieru ghjudeiu è l’affanni  ch’omu sà

11-Donna da l’ermina, Da Vinci, cullezzione di i principi  Czartoryskich

12- mine di sale Wieliczka,  sfruttate da u 13 imu seculu

13- Cappella Santa Kiga , 135 metri sottuterra, tuttu in sale da fondu à cima

14- lavi sottuterranii drentu à a mina

15- Cantellu di sustegnu in legnu, ghjoba da sala di spettaculu per via di l’acustica