Più và è più si dice ch’ellu ci vole à avè “U sale in Zucca”. Unu ch’ùn ne hà sale in zucca, face... n’importa chè...

Noi avemu fattu ancu di più. Ci hè parsu chì quellu più salitu era sicuramente quassù...

Andà è vultà pè issa spassighjata ? Parte, si parte da Biguglia u paese. Vi ci vole à fà 8 o 9 chilometri à pocu pressu. Pè attippà è rifalà, cuntemu 4 ore è un quartu d’ora. U slivellu più altu face 800 metri. U mondu ci hè è ci si scontra ghjente, ma ùn hè propiu folla è ci si gode una bella stonda. Dicenu spessu ch’ellu hè megliu à andà ci di veranu à sinu  à a fine d’estate, ma à chì hà sale in zucca, ùn si lampa à ochji chjosi, ùn hè vera ?

Dunque fighjate u celu, e dinò e previsione meterulogiche.

È s’ellu hè bellu u tempu, piglierete u chjassu chì passa da a Chjappella Sant'Andria. Dopu diventa à pena di più petricosu è ùn si stà tantu à sbuccà quassù, in cima à u Monte Zuccarellu. Da custì  si vede u panorama nant’à u Stagnu di Biguglia, u mare è l’isule sinu à l’arcipelagu di Tuscana, è di l’altra banda Oletta è u golfu di san Fiurenzu.