À quiddi tempi, ascultendu à Ghjesù, l’omini erani divintati più virtuosi, è faciani menu piccati.

Satanassu, in fondu di u so infernu, si lagnava chì l’animi ch’eddu ricivia, ci n’era di menu in menu!

Allora pinsò :

-« Nant’à a terra, aghju da metta un’ustaria nant’à a strada induva passa u più di ghjenti, chì si chjama a « strada di a curiusità ». Sarà tinuta pà i me dui figlioli : Malachamè è Scurticheddu. L’aghju da scimpià a faccia à tutt’è dui di manera ch’eddi fussini veri mostri. »

 

Chjama i dui figlioli, spiighendu li ciò ch’eddu vulia : « 

-Andeti nant’à a terra è tinareti l’ustaria di a Strada di a Curiusità. Aghju da cambià u vostru visu pà renda lu spavintosu, è quandu un omu vi vidarà, diciarà :

 »Madonna! Chì hè successu? Comu aveti fattu? ». Tandu u tumbeti è u m’invieti in infernu.

-“Ma quantu hà da durà issa cosa?” dissi Malachamè?

-« Cumpiarà è vultareti quì quandu un clienti ùn diciarà nudda, alcuna cumpassioni di u vostru aspettu spavintosu. »

 

 È Satanassu faci di i so figlioli dui mostri : più capeddi, ochju cripatu, arechji tagliati....

 

 È ni partini. In fatti l’ustaria vidia passà mori ghjenti. Tutti quiddi chì si firmaiani diciani :

- «Salva! Chì vi hè accadutu! Comu aveti fattu… » videndu a faccia di i dui diavuleddi. 

Tandu erani tombi, intazzati è a so anima inviata à u babbu in infernu! Satanassu era cuntenti.

 

Ma à quiddi tempi c’era una donna chjamata Matalena, chì avia trè figlioli. Ùn li pudia addivà chì era puvaredda. À u più maiò, Petru, li deti vinti franchi. È li dissi :

 

-« Vati ni pà issu mondu, u me figliolu , è cerca di fà furtuna. »

Petru si metti in viaghju è trova una bedda strada, Un pocu più luntanu, dop’à un ponti, vedi un’ustaria. Si prisent’a à u patronu ma à pena lu vistu, è mantagatu!

-« Santu Diu. chì vi hè accadutu pà essa stroppiu cusì? »

 

Tandu i dui diavuleddi u tumbetini, u scurtichetini è u invietini à u babbu a so anima in infernu, chì pocu à pocu s’impiia dinò.

 

Matalena dissi à u so sicondu figliolu, Dumenicu, à stessa cosa ch’à Petru. Si metti anch’eddu in viaghju, scontra l’ustaria maladetta è comu u so frateddu, si faci tumbà è invià in infernu.

Tandu Matalena, chì l’hà sappiuta, invia u so più ghjovanu figliolu, Franciscolu, à fà anch’eddu furtuna pà issu mondu.

Franciscolu si metti in viaghju è scontra una bedda donna chì li dissi

-« Indu’vai u me zittedu?

- À fà furtuna pà issu mondu. Mamma m’hà datu vinti franchi.

- Pà fà furtuna mi devi cumprà, pà vinti franchi, trè cunsigli.

- Eccu li. Dà mi i to cunsigli.

- U prima hè d’ùn sceglia una strada nova, ma di piglià una vechja strada.

- U sicondu hè d’ùn mischià ti di l’affari di l’altri.

- A terza hè d’essa cioncu è cecu. Nè vedi, nè senti nudda. »

 

Franciscolu li deti i vinti franchi, a ringrazia, si metti in viaghju è trova in stacca soldi in quantità! Ùn sapia ch’edd’avia scontru a Verghjini Maria!

 

In viaghju vedi una bedda strada è accantu, una cattiva. Ma ciò chè hà dittu a bedda donna, si n’hè invinutu. Presi a cattiva, senza sapè chì i latroni piattati nant’à bedda strada l’avariani tombu.

Più luntanu, una banda di sgaiuffi si battiani à colpi di bastonu. L’avaria aiutati à spiccà si ma a bedda donna avia dittu : “Ùn ti mischià di l’affari di l’altri. »

 

 Allora i lacheti sbruglià è ghjunsi à l’ustaria di i diavuleddi. Senza avè dittu una parola di cumpassioni videndu li, si feci serva un bon ripastu, u pacheti è ripresi a so strada. Tandu i diavuleddi si mettini à briunà :

-« Comu! Aveti vistu a nostra faccia? È ùn ni diti nudda? Aveti u cori cusì duru?

-« L’affari di l’altri ùn m’arriguardani.”

È si ni và senz’altru.

 

Allora Satanassu, chì hà persu u puntu, chjama i so figlioli :

-« Vulteti in infernu vicin’à mè, aveti compiu u vostru travagliu. Ma prima bisogn’à brusgià l’ustaria, ch’edd’ùn fermi nudda. Vi mandaraghju prestu nant’à un’altra strada di a terra à cuntinivà u travagliu »

 

Franciscolu, eddu, ascultendu i cunsigli di a bedda donna, vogliu dì a Verghini Maria, hà di sicuru fattu furtuna un ghjorn’o l’altru, prima di vultà ind’è a so mamma pà goda inseme una vita felice.