A famiglia di Philippa Santoni hè di u paese di Ghjannucciu. Ella hè nata in Aiacciu, ci hà fattu i so studii è po dopu hè andata in Corti à l’università. Hè in siconda annata di master ricerca di studii corsi.

Sculare di liceu,  hà avutu u Premiu Andria Fazi in u 2014.

Hà messu à scrive regulare in l’attellu di scrittura in lingua corsa di u Centru Culturali Universitariu (CCU) è u so libru L’eiu stesu (ALBIANA-CCU, 2018) hà buscatu u Premiu di u libru corsu in u 2018.

A più parte di i testi esciuti in L’eiu stesu l’hà scritti in un lampu di trè mesi è l’altri sò stati creati durante e senze di l’attellu CCU. L’inseme hè scrittu cumu s’ellu fussi una cunfessione, un’identità chì si cunnosce è si palesa, ma ùn ci sbagliemu! U ghjocu di parolle “eiu stesu-eiu stessu” ùn sarà digià issa bella incertezza chì insegna quantu a cumplessità hè literaria? Cum’ella hè cumplessa a vita, diceranu ancu parechji... D’altronde issu “eiu” sarà ambiguu cumu sarà quellu di a donna chì scrive. Lighjendu à Philippa, spicca subitu subitu una scelta narrativa permanete: u soliloquiu.

Quessa a scelta a ritruvemu dinù in l’altru libru Scidditi puru u me nomi (ALBIANA-CCU, 2018). Un soliloquiu è quandu sarà ammintatu un interlucutore, quessu si firmerà sempre mutu. Philippa a dice in un’intervista radiofonica (1) . È si trova dinù ghjorni fà, in A Settimana di u venneri 26 di ghjennaghju.

U scrittu di Philippa rimanda propiu à u scopu ch’ella vole tuccà. Cunvinta ch’ella hè chì u prugettu di creazione parte da un’interrugazione sempre listessa. Una dumanda da sè à sè, qualsiasi u racontu è po i fatti, sintimi è avvenimenti stalvati in ciò ch’omu scrive! Narcissisimu cumpiacente? Mancu stampa. Hè propiu vuluntà di sapè quale hè chì campa è pensa quandu campu, pensu è posu... scrivendu.

Si capisce quant’elle ponu diventà angusciose isse quistione fatte senza pudè mai truvà risposta chjara chjara, cumpletta è definitiva, puru s’omu stringhje a ricerca cun l’arnesi è puntelli teorichi cum’è quelli di a filusufia. Ma issa intruspezzione decisa è prugramata ùn stà tantu à piglia e vie di a literatura un filare dopu à l’altru, un testu dopu à l’altru è oramai, cun stu Scidditi puru u me nomi ... un libru dopu à l’altru.

Di fatti sta seconda publicazione adopra più chè u libru di prima una scenarizazione di l’intruspezzione chì copre l’inseme di u libru. Sò cusì 44 pagine oramai urganizate in dialogu (2). Issu modu di sugerisce u decoru è di mette ci vita è muvimentu inghjenna una scena di l’enunziazione d’estru persuasinu chì ùn stà tantu à purtà ci in una finzione. Hè ghjustu à puntu issu prucedimentu chì muta a riflessione è mette in ballu a creazione literaria è garba à u lettore, puru s’ellu ùn hè nè spezialistu nè amatore di filusufia. Hè un veru teatru di a parolla chì piglia vita in isse infrasate duv’ellu si tesse à tempu riflessione nantu à l’identità è a so  rapresentazione puetica è scenica. Sinu à crede ancu ch’è no simu spettatori à u teatru. Custindi, a “parolla” di Philippa è di u so narratore hè spartuta in 7 testi corti atti à ricuverà l’inseme di u barattu: u locu, l’attori di l’enunziazione, i temi è i sintimi ch’ellu move u scambiu –s’ellu si pò dì postu chì l’interlucutore piglia mai, o quasi, a parolla- è per compie i limiti di a spressione. Venenu dopu 10 lettere indirizzate à persone interessate da l’identità di quellu/a chì hà parlatu. Cuntinueghja in issu modu è si chjode cun 2 altre lettere cun l’ultima chì porghje u so titulu à l’opera sana in forma di cunclusione.

Vene à dì quant’ella hè custruita in forma di chjerchju a creazione. À chì leghje li si affacca, bella sicura, u spettaculu è l’atmosfera d’un pensamentu cun l’angoscia scritta ad ogni mumentu. Ma a scena discursiva è narrativa, cusì custruita in modu dialogicu, barattu ùn stà ind’è l’angoscia. Ci si move, indrentu à l’intruspezzione, a vita animata assai di una mente attente à capisce, cuntrullà è purtà l’identità di a persona chì si dice, di fronte à l’alterità è u passa è vene trà unu è l’altru. Sinu à u puntu ch’ellu si schjarisce u titulu: Scidditi puru u me nomi, una pruposta chì puderia ancu passà da abandonu è ricusu di l’identità persunale! È chì si dice scrivendu! È scrive ùn hè mancu à pena rinunzià à campà. Hè propiu u cuntrariu. Philippa a dice è a ripete tante volte, un scrittu dopu à l’altru in i so dui libri chì sò, hè chjara, un quaternu di vita.

(1)  RCFM cun Cristofanu Zagaglia in “À libri aperti”, luni u 16 d’aprile 2018

(2)  I tituli d’issi testi corti insegnanu l’itinerarii d’issu dialogu cù un interlucutore zittu, ma mutu mancu à pena:

Crià ma micca ricrià (p. 11) U Cripacori  (p.13) U mandigliu (p.17) A vera puetessa sè tù  (p.19) A palisatrici (p.21) I nosci cunfini (p. 23) Primu sbagliu (p. 27) Lettara I (p.29) Lettara II (p.31) Lettara III (p. 33) Lettara IV (p. 35) Lettara V (p. 37) Lettara à Minnana (p. 39) Lettara à vo (p. 41) Lettara à i spiddaculi (p. 43) Lettari ad eddi (p. 45) Lettara à mè (p. 47) Scidditi puru u me nomi (p. 49) Sarà l’ultimu (p. 55)