I Fiumi Fratelli

Monte Cintu genitore
Di Golu gegante Fiume
In spartendu lu s’amore
Dedde ancu à tè vita è lume
Escenu da lu so core
E to ballarine sciume.

Quandu à creazione
Da a quale parte tuttu
Anch’à tè o Stranciacone
Di Cintu ti fece fruttu
Hè ind’è u listessu reghjone
Lu principia u to sgottu.

Mà hà vulsutu l’azardu
Lu pigliessi un’altra strada
Ellu hà lampatu lu sguardu
Ind’è e sponde di a Scala
Di transita per Francardu
Bellu bellu si ne fala.

I to salti sumiglianti
Fra mez’à sciappali appesi
È i to canti languenti
Da l’alte cime sò intesi
I t’armuniosi accenti
Sempre annannanu l’aschesi.

Quandu sparti è quandu stretti
Cun primura fiumareccia
Francate ponti è traghjetti
Per sbuccà in Ponte Leccia
Quì per cumuni traggetti
A vostr’acqua ci s’intreccia

È in gioia trapughjate
Inseme l’Ascu è Golu
Quella strage ramintate
In ghjunghjendu in Ponte Novu
Di quell’acque insanguinate
Purtate l’eternu dolu.

Nati in l’alte cunfine
Di le più alpestre sarre
Trescinate senza fine
In Marana acque chjare

Sepolte ind’è e turchine
Stese smense di lu mare

MINNELLU d’Ascu – Stefanu GRISONI

Dumenicu GUERRINI dettu MINNELLU

Stefania

Era un aschese mortu in 2002 à 62 anni
U so babbu Anghjulu era pueta di lingua corsa è francese, u so babbone dinù (Minnellu d’Ascu) era un pueta cunnisciutu.
Era d’una famiglia di pastori (babbu è babbone) chì tenianu i so animali ind’u disertu di L’Agriate po dopu in Moltifau.

Michele

Avia giratu u mondu sanu, ma hè vultatu quì, da ch’ellu hà pussutu, per stà ind’u so caru paese d’Ascu.
Era un omu discretu, sinceru in amicizia, rispettosu è sicretu.
Era dinù cunnisciutu da e so impruvisate di qualità.

Camella

Da a so creazione in MONTE CINTU correnu ind’i lochi cari à l’autore per moresine in mare versu à A MARANA.
Ne parla cum’è s’elli eranu parsone, fratelli.
Conta u so viaghju staccatu longu à duie valle sfrente cum’è duie parsone nate di listessu sangue purtzate da duie vite spare ma chì u distinu riuniscerà per fà un pezzu di strada inseme. « L’ACQUA CORRE U SANGUE STRINGHJE ».

Brigitta
FIUMI FRATELLI hè una puesia cumposta da Minnellu d’Ascu in u 2003. L’autore l’hà scritta in sestine d’ottunarii, vale à dì 6 versi d’ottu pedi. Sta strufata tradiziunale permette à i scritti d’esse cantati sia in pulifunia sia cù una voce sola. Hè cusì chì sta puesia, data da Minnellu, hè stata messa in musica è cantata da Stefanu Grisoni.
U so ritimu hè quellu datu da a corsa di I dui fiumi Golu è Stanciacone.