Oghje in a mo Cursichella

Un lamentu in spartera

Franca e generazione

Lagna a nova manera

Di i corsi in mutazione

È si cerca è si spera

À parà la perdizione

 

A lingua và à cadernu

Morta, digià interrata

Piglia forza u modernu

Robba di for' impurtata

Paradisu contru infernu

Terra ormai ruvinata

 

Oghje in a mo Cursichella

Si sente tamanti pienti

Ughjula a malacella

Annunzientu li scumpienti

O chì vita meschinella

O li tinti incuscienti

 

Corsica sacrificata

Soffre è ritene lu fiatu

Brama d'esse preservata

Cum'è eri immaculata

Cosa serà lu peccatu

Pover'isula straziata

 

Dio vi salvi Regina

Di stu locucciu patrona

Cū a stella matutina

Tenicci caru è perdona

Ti pregu ogni matina

Quandu a campana sona.

 

Cathy Campana