Pè andà subitu à cunsultà i ducumenti, cliccate nantu à e parolle scritte in rossu

Salute,
Sta volta,

SIMANA DI A LINGUA 2013
Cun Radio Corsica Frequenza Mozza vi vulemu cuntinuà à fà sparte u piacè ch’è no ci avemu gosu in u prugrama di a SIMANA DI A LINGUA CORSA CTC di ghjugnu scorsu. Hè stata l’occasione di rivede a cumedia scritta cun talentu da Paulu Michele FILIPPI, prufessore, pueta è scrittore chì da tanti anni illustra a pruduzzione in lingua corsa. A risa, cun ellu, hè sempre prufonda, puru s’ellu si scaccaneghja chì u comicu u tesse propiu, trà riflessione critica è campazione.
Sta pezza quì mette in scena un’animatrice di radiu chì si trova, à l’ispensata, in un’angoscia scema. Di fatti i so invitati, pueti lucali, ùn sò micca à l’ora. L’emissione hà da principià; ùn ci hè nimu... È tandu li vene un’idea: s’è u regissore tecnicu hè d’accordu, puderanu fà nice... Allora, a li provanu à rimpiazzà... i pueti chì ùn sò ghjunti!

BONANOVA 28-29
A rivista di l’Associu di u CCU oramai esce una volta à l’annu, cù un numeru doppiu (un centu di pagine, mostra di opere di un artistu, parechje rubriche). Dunque avemu u piacè di offre vi a versione numerica di a rivista esciuta stampata nantu à carta qualchì mese fà. Ne aviamu presentatu digià dui pezzi. Pruveremu oramai à assicurà issu doppiu serviziu versione cartacea è numerica.
Ramintemu chì issa rivista esiste da parechji anni è ch’ella porghje scritti di riflessione è di creazione in varii generi literarii. Un’apertura nantu à e literature di u Mediterraneu vene à cumplettà u spechjata di a vita culturale cum’è no a campemu ind’è l’attività di l’associu.
S’è vo avete à core di aiutà ci per stampà a versione nant’à carta è riceve la in casa, fate u piacè di arrugà vi mandendu ci un sceccu à:

ASSOCIU DI SUSTEGNU CCU
Università di Corsica
20250.CORTI
Un numeru doppiu costa 6 €