DA TUSCANA

Scontri di 15.06.2013

Cun Gabriele BENNUCCI di Livornu sò state parechje e realizazione ; trà quesse u prugrama EX-VOTO, è po MORES (cf.nantu à InterRomania in a rubrica Teatru) è po, pocu fà, a prugramazione di a pezza di teatru TESTA DI RAME rapresentata in Corti è chì hà permessu un bellu travagliu di studiu è di baratti cun studianti è attori. D’altronde ùn si starà tantu à publicà a versione trilingua (livurnese, talianu, corsu) d’issa pezza chì ammenta u cuntestu di a fine di a seconda guerra mundiale, quandu i scafandriè, i palombari, sgumbravanu u portu di Livornu da i battelli affundati durante i bumbardamenti americani. Una passata chì hà a so para in Bastia è hà ispiratu a pezza di Paulu Michele FILIPPI ghjucata da U TEATRINU : Sottu à l’acqua.
Issa vicenda hè prulungata oghje da una publicazione bellissima : TESTA DI RAME, in a casa editrice Titivillus. Piglia postu in a cullezzione « I Diavoletti » dedicata à i zitelli. Hè propiu una campa issu libru ducumentatu, pedagogicu assai, illustratu da ritratti è disegni scelti cun arte è pertinenza. Si spera chì i maestri di e nostre scole si lamperanu à leghje issu libru : http://www.ibs.it/editore/Titivillus/titivillus.html Li sarà propiu di prufittu pè stradà imaginariu è memoria, senza cuntà u piacè tamantu ch’ella porghje a cuntinuità linguistica in a Rumania.