Frédérique VALERY hè duttore in Lingue è Culture Regiunale, spezialista di Storia di l’Arte è insegna à l’Università di Corsica. Hà participatu à tante publicazione è culloquii in issi duminii di ricerca.
      E so primure scentifiche a portanu ver’di l’Arte, u Patrimoniu materiale è immateriale, a Religiusità pupulare, u Baroccu in Corsica è in a stesa mediterranea in particulare. In u prugrama di u CCU sò state propiu rimarcate e duie cunferenze ch’ella hà prununziatu à a fine di u 2012 in u quatru di l’Università Inter-Età.
      L’anni Leonor FINI in Corsica hè statu u tema di a prima. U garbu d’issa spezialista di l’arte è di a storia di e spressione artistiche ùn mancarà di ripurtà ci à cunsiderà l’anni passati in Corsica è l’opera fatta ci da Leonor FINI ind’è l’anni 1960-1980.
       U Land Art in Nonza hà fattu vede quant’ella hè grande a so sensibilità è a so primura di l’azzione assuciativa è socioculturale. Issu linguaghju artisticu, l’andatura trà gestu empiricu è viaghju imaginariu li hà ispiratu altru è tantu passione pè e forme di l’arte efimera nate è crisciute sti pochi anni in i so lochi capicursini, in Nonza.