A VACCA PENSIUNATA

Attività altre

A VACCA PENSIUNATA

di Ghjuvan Petru RISTORI

Sentu dì ch’in Inghilterra

E vacche sò tutte sceme,

Sia burla, sia vera

Di manghjà carne si teme,

Di a pessima manera

Ci abbuleghjanu inseme

Eiu sò vacca cursina

È di ceppu paisanu,

Nata in una rasgina

À la fine di veranu,

À luna duminichina

È di u quartu suttanu

M’anu allevatu à bradu

Piuttostu à cicchiciambera,

È m’anu ancu premiatu

Ma campu à straziera,

Chì m’hè difesu u pratu

È di pasce a maghjera

S’ella hè scema a vacca

U vaccaghju hè astutu,

Si mette u premiu in stacca

È campa bellu piumutu,

Sempre fieru a li spacca

Grassu, tondu è ben vestutu

Altra cagione di lita

Chì bellu pocu mi garba,

Per falla di più cumpiita

Li danu un premiu per l’arba,

Invece m’hè pruibita

Siasi passa o maciarba

Annu scorsu hà trescinatu

Piottuli è rete à veru,

Un pricoghju hà sarratu

À rombu di fil di ferru,

Una stonda aghju pensatu :

Ùn lascia più nunda à gueru

Per arrizzà isse sarrende

S’hà toccu un pataccone,

Ma, in fatti, mi difende

D’entre à pasce u reghjone,

Chì à d’altri, u si vende

È mi tene per stradone

Sempre fora à u celente,

Famita, passu l’inguernu,

Aghju u pelu lucente

Per via d’un cotru infernu

Quand’ella passa a ghjente

Sò ancu sposta à u schernu

Mentre chì quellu sughjettu

Cù u mo premiu figura,

Eiu raschiu u fussettu

È patu fame è cutrura,

Cù u tramannu in pettu

Di sterpà qualchì vittura

Ogni tantu qualchì toru

Ind’a socita s’affacca,

Cum’è tutte m’innamoru

Hè a mo gioia di vacca,

Per quill’altru hè tant’oru

Chì vitelli ùn si ne stacca

Mi piengu sempre in vanu banu

È mi passu a stagione,

À pensà chì issu furdanu

Si manghja a mo pensione,

S’affaccherà di veranu

Per cambiammi di stradone

Quandu u cerbellu scaglia

Sunnieghju in cunsequenza,

Ch’o dormu nantu à a paglia

Chì di fenu aghju una lenza,

È pè premiu a medaglia

Quella di a resistenza.

Letta da Cathy Campana

Imprimer Envoyer par e-mail Partager sur facebook Partager sur Twitter Partager sur Google+