Versione :
Corsu

Pigna 15

 

In un' angulu fertile
D'una terra di cuccagna,
Trà l'aghja è u mitile
À trita s'ammansa, pagna,
È s'erege un cappile
Chi culmina a Balagna.

Ci prucedenu l'Anfarti
À fà valè a s'aghjata
Chì, per lu più, senza scarti,
Hè da tutti ben' pregiata
È l'èstimu di e parti
Chere sempre a nuttata.

Ma qualchì musa maligna
Passa in un sfrullu d'ale
È a porta ch'ella sgrigna
À a Casa Musicale
Apre 'ssa notte, in Pigna,
Un presepiu di Natale.

Ci vene strettu u spaziu
À l'intramu d' issi muri
Duve gudimu u daziu
Chì sfuma sti tempi scuri
È eiu, pè u ringraziu,
Ci cantu i m'auguri.
Ghjuvan petru