A FINLANDA, U PAESE DI BABBU NATALE

In u paese di Babbu Natale…

Omu crede ch’ellu vene d’indocu. Ma pè i Finlandesi, ùn ci hè dubbitu : Babbu Natale campa in u so paese. In Laponia, nant’à u circulu pulare, si pò ancu visità u so paese : Rovaniemi. Ellu vene da a misteriosa Korvatunturi, chì vole dì "A Muntagna cun l’Arechja" in a so lingua. Si circula nant’à a neve in sculiscetti à cani, à mezu à casucce di legnu. Rovaniemi hè una oasi urbana in u core di i paisaghji artichi salvatichi, un locu induve cultura, attività difora è magia si mischjanu. L’omu in rossu hà quì u so uffiziu, u so paese è u so parcu di divertimentu, induve accoglie i visitori di u mondu sanu. Li pudete scrive una lettera, parlà cun ellu, piglià un ritrattu cun ellu è ancu attraversà u Circulu Articu, chì passa per u paese di Babbu Natale. Ellu hà ancu a so posta ufficiale, induve i zitelli mandanu i listini di i so ghjoculi preferiti.

Aspettendu i rigali…

Per Natale, ogni famiglia hà l’abitudine di riunisce si in u bagnu di vapore di a casa. Hè una pezzuccia tutta di legnu è ascaldata assai assai. Ci si suda un bellu colpu è dopu si piglia una bona duscia ghjalata, si ruzula in a neve… o si ciumba in u lagu ghjacciatu ! Issu bagnu di vapore di u 24 di decembre permette di scurdà si di tutti i penseri di l’annu… Aspettendu Babbu Natale !

A vita in Laponia…

In u norde di a Finlanda campa u populu Sami. In issu locu ghjalatu a vita hè dura. I laghi fermanu ghjacciati una bona parte di l’annu è a terra, cuverta di neve, ùn pò esse cultivata. Dapoi più di mill’anni, i Sami sò i spezialisti di l’alevu di e renne. Issi animali li procuranu carne per manghjà è pella per tene si callu.

A Finlanda hè ancu un paese induve si ponu ammirà l'aurore bureale magnifiche, isse luce culurite chì ballanu in u celu. Sò cagiunate da particule di sole chì pichjanu contr’à l'atmosfera di a Terra. Si ponu vede soprattuttu in invernu, quandu e notte sò longhe è bughje. A situazione geugrafica di u paese di Babbu Natale è i so circondi ne facenu un locu ideale per osservà l'aurore bureale.

BABBU NATALE

Uffiziu pustale principale di  Babbu Natale

Tähtikuja 1

Circulu Pulare

96930 Rovaniemi

FINLANDA