......U Rettori Cutuli

 

Pà issu picculu travagliu di scritturaghju sceltu parta di una certa rialità storica, è di accuncià la à a me manera, cù un sensu novu, è dendu un’ antra vita à un certu ‘Rettori Cutuli’, anticu paisanu chì hà stampatu una cria in i so tempi a nascita di l’università di Corsica

 

Corti, prutetta da i so vangoni è i so muntagni pinzuti, hà sempri avutu una funzioni militaria maiò. À u 9u seculu dighjà, era una piazza forti. À u seculu 13u, i Ghjinuvesi si ni sò impatruniti accupendu l’isula . In u 1419, un sgiò feudali corsu, Vincentellu d’Istria, acquistò a cità e feci custruiscia a citadedda.

Più tardi, a Banca di San Ghjorghju, urganisimu militariu è finanziariu ghjinuvesu, ricevi a cità da i mani di i Signori di Campu Fregosu.

Cù a spidizioni francesa, in u 1553, u maresciallu di Thermes mandò Sampieru Corsu à cunquistà a cità. In Corti, Sampieru accogli a pupulazioni è una maiò parti di i capimachji corsi, pà a causa francesa.

Dopu zifratu A Paci di Cateau-Cambresis, in u 1559, a cità hè ricunquista da i Ghjinuvesi.

In u 1734, una volta di più i Francesi si impatrunisciani d’issa cità.

I Naziunali ni pigliani pussessu in u 1745. À listessa epica Ghjuvan Petru Gaffori, tandu chjamatu ‘Generali di A Nazioni’ in u 1751 à a Cunsulta d’Orezza, dà di novu a libartà à a cità.

Corti fù dunqua da u 1755 à u 1769 a capitali di a Corsica Indipendenti, cù u generali Pasquali De Paoli.Stu “generali di I Lumi”, amicu di Jean - Jacques Rousseau è James Boswell, riurganizeghja u so statu è dà à u so paesi una custituzioni demucratica stabilizendu a spartitura di i puteri è a supranità di u populu, crea in a capitali un’ Università…

 

Frà tempu, è qualchì muntagna più luntanu, varcatu Vizzavona, si trova u paesi di Cutuli è Curtichjatu.

À l’epica, erani pucareddi quiddi chì aviinu pussutu andà in iscola o riceva una struzzioni. I ziteddi, ghjunti à l’età di pudè purtà un biddò di latti o d’acqua raprisintavani subitu bracci pà travaglià, ma pocu ciarbeddi pà pinsà, è essa capaci d’invintà una filusufia nova di a nazioni corsa, fresca fresca maturata nantu à l’arburu di a dimucrazia. Eppuru s’eddi avviini avutu un’antra scelta i si sariini mandati ancu cù piacè incù qualchì maestru o incù qualchì preti i so zitedducci cari, ma era cusi, pocu erani l’eletti, è prima, ci vulia à magnà. Alora s’e vi parlu di un paisanu, ma chì eddu avarà almenu avutu issu vantaghju d’avè u ciarbeddu è u corpu à bastanza pieni pà pudè accupà si di a sorti di l’altri nanzu à pinzà à a soia .. à quali pinseti?

U prublema si trova quì ghjust’à puntu. Issa parsona, ùn n’aveti mancu una volta sola intesu parlà, postu chì a storia si n’hè scurdata una volta a so opara compia. Ma avarà avutu u tempu almenu di compia la ?

À l’epica, da omu di bona struzzioni è d’intilighjenzia, hè statu sceltu un ghjornu da un omu ch’avia dicisu, a Corsica divintata nazioni, di fà ni u rettori di l’Università.

Ghjaseppu Cutuli dettu « Ghjasippolu » era figliolu di Ghjuvan Antimu e di Anna Maria di Curtichjatu, terzu figliolu di una famiglia di ondici criaturi. Era un ghjuvanottu chjucchettu, abbastanza tondu ma pienu di vita è di intilighjenza. Fù dicisu di faddu preti chi bisogna ci n’era… Issu omu di valori, tutti l’amavanu è par via di u so gran sapè, era propriu bè rispittatu in paesi è in tuttu u circondu ;

Hè cusì ch’edda cuminciava a so vita d’omu di ghjesgia. Pritinu era sempri statu, è po in issi tempi, a struzzioni ùn pudia vena cà da omi di rilighjò.

Era cunnusciutu di tali manera, chi era ancu divintatu l’amicu di un certu Pasquali de Paoli, chì, dopu liberatu a Corsica, l’hà incaricatu di a bona andatura di l’università, chì pà a prima volta era criata in Corsica ;

Ma u travagliu era beddu difficiuli... Ci hè vulsutu à essa di un avanguardisimu tamantu à u mondu pà invintà vii novi missi à a dispusizioni di studienti cusì pocu numarosi, è in una nazioni cusì povara, cusì runzicata da i guerri, u pinseri di sopraviva; era un veru eserciziu di cumpusizioni; s’è omu faci u paragonu trà oghji è in issu tempu, ci vulia à avè l’imaghjinazioni tandu!! Ma oghji, quali saria capaci ind’i nostri tempi di riescia un tali travaglionu ?

 

L’annati passavani, era spartu trà a so vita di Rittori in Corti, duv’eddu t’avia u travagliu è l’amichi, è trà i tempi di parmissioni chì si ni pudia vultà ind’u so paiesi tantu amatu di Curtichjatu, à ritruvà a so famiglia cara è i so ricordi di ziteddina chì si n’erani fughjiti senza mancu essa si ni avvistu. O quant’eddu li pudia mancà u so paisolu di virdura è di petri rossi ! Eppuru ùn t’avia mai u tempu di cascà in l’anogliu, ma sò di i raghjoni di u cori ch’ùn ci voli à spiicà, hè cusì l’affari .

Amicu di Paoli, era danò divintatu più tardi quiddu di James Boswell.

 

Una volta, li avia prupostu di passà unipochi di ghjorni in paesi à l’avucazioni di i festi di San Martinu, san‘ patronu di u paesi; James Boswell, parsunaghju à tempu carismaticu è curiosu, ma vuluntariu di natura, accittò subitu è s’astradetini à u fà di u ghjornu dopu.

U viaghju si facia nant’à u spinu di un cavaddu. Ci vulia una ghjurnata è mezu pà andà da in Corti à Cutuli. Ben intesu, solu a ghjenti nobili t’avia i cavaddi, pà l’altri, u viaghju si facia sia à pedi, sia nant’à u sameru è u bassu…

Un ghjornu è mezu dopu, ghjunsini in Cutuli è Curtichjatu … Tutti i paisani erani vinuti à accoglia i visitatori .

Ogni volta ch’eddu si ni vultava in paesi era una festa, in più sta volta ci era un invitatu, è facia un beddu pezzu ch’eddu ùn ci era più vinutu in i so lochi. Ognunu facia a so visita, è à chì purtava dui pezzi di legnu pà u focu, à chì facia una o dui torti di farina castagnina, à chì s’affaccava incù i noci, i nacioli è i fichi secchi. I so paisani, cuntenti di u ritornu di u “sgiò Rettori” participavani com’eddi pudiani à u so bonu accogliu è, ancu puru s’è tuttu u mondu era in una miseria nera, u tempu d’una stonda ognunu mittia tuttu u so pudè pà sparta incù gioia è alegria issu mumentu di fraternità .

Sciglitini d’apra u vechju casali di a famiglia pà passà i quattru ghjorni è pà dorma ci. A casa t’avia u muscu forti di u mischiu di a pula, di i vechji panni è tindoni magnati da i tinioli, è di u legnu mezzu è infunghitu chì li pizzicava u nasu è a gola. In tarra, i chjappazoli anziani faciini com’è un ghjocu giganti di scacchi. I scaloni tamanti s’uffriani à mezu à a pezza, cuddendu versu à u prima pianu, duva una finestra s’apria sopra à un giardinu è una pargula, spricciacati sottu à u pesu d’un piombu di l’uva matura è tracarca chi nimu ùn avia coltu fora di i tupanchjini è di l’accidducci ; un vechju rusulaghju di almenu una cintina d’anni s’inturciulava à a vigna pizzichendu la cù i so tanghi, è si cunfundia di tantu in tantu incù a littara bè arrimbata incù i so sgranfii piantati ind’u muru scialbatu da un impiastru fattu di calcina è di tarra biddeta ; tuttu custì era segnu di mezu abandonu, a natura avia dicisu di ripiglià i so diritti, postu ch’edda ùn era più cà a sola maestra di i lochi .

Ma quantunqua li facia mali di veda li in issu statu, magnati da a virdura.

 

U ripastu fù bonu è in quantità, ancu puru s’è Boswell fù quant’ à eddu appenuccia suspresu da a simplicità di l’alimenti chì u cumpuniani. D’issu ripastu, ni firmeti una traccia stampata ind’i so scritti di u so viaghju à u scontru di a Corsica è di i Corsi, è di u so passaghju in Cutuli, mintuendu u so amicu u rittori Cutuli è l’alimenti cù una pricisioni schietta. Purtanti, di i beddi tempi di dulcezza è di benestà ne ghjunsini à lestra à a fini .

Genuva, s’era mintinuta in i piazzi forti ch’edda avia custruitu longu à i costi di a Corsica. De Paoli hà sempri ricusatu di trattà incù Genuva, è issa ripublica si ghjira tandu verdi a Francia.

Fendu nici d’essa u veru paceru trà a ripublica è i Corsi, Choiseul, ministru di Louis XV, ublicheghja Genuva à dà l’isula ma incù un accunciamentu finanziariu à l’avucazioni di A Paci di Versailles in 1768. Sta vendita mascarata faci, contr’à edda, a cuncolta di i Corsi è u 22 di Maghju, à a cunsulta di Corti, Pasquali De Paoli chjama à a rivolta generali.

 

In pochi anni, in pochi ghjorni, tutti issi spiranzi, tutta issa via, issa vita nova, issu sintimu prufondi è issu gustu dolci di libartà chì i Corsi ùn avarani avutu cà u tempu d’assaghjà lu solu, tuttu si ni casca in ruina… chì pò nascia dopu à tanti frustrazioni, u disgostu è i disguati amari di un tempu persu chì si ni và pà sempri…

U Sgiò Rittori è tutti l’altri chì era a so vita avà? Chì li firmava à fà ?

Ch’avia da divintà a Corsica tandu, rifalendu midd’anni in daretu è pirdendu in un ghjornu tempu spiranza è libartà di u so distinu?

Ind’i so ochji, si pudia leghja chì tuttu era compiu ; ma avia danò capitu chì issu soffiu di libartà ùn firmarà cà comu un beddu sonniu, luntanu è chì mai più ùn si pudarà pruducia.

È avarà avutu à raghjò l’anticu è paisanu nostru rittori Cutuli, chì dapoi chì issu tempu si n’hè andatu, mai più u venti di a libartà ùn hà suffiatu cusì forti annant’à cara tarra di Corsica nostra, urfania .

Hè par quissa chì dui ghjorni fà, un ligramantu hè vinutu à pichjà à a me porta. Era un certu M. Cutuli, rittori di l’università di Corsica, chì circava a so strada pà ghjugna à un mondu chì ùn cunnucsimi micca noi, u mondu duva a Corsica fù una tarra libara…