MESSA À GHJORNU DI U 31 D’AGOSTU DI U 2013

 

Pè andà subitu à cunsultà i ducumenti, cliccate nantu à e parolle scritte in rossu
Salute,
Sta volta,

SIMANA DI A LINGUA 2013
 

Cantu corsu da u 1970 à l’oghje


U prugrama di a SIMANA DI A LINGUA CORSA CTC di ghjugnu scorsu hè statu più chè diviziosu. Saria un peccatu à ùn vultà cun primura è cun l’asgiu à rivede è ripiglià tuttu ciò ch’elli ci anu arricatu e varie parte d’isse ghjurnate in l’onore di a lingua nustrale è e prublematiche ch’ella inghjenna.
Oghje purghjimu una stonda di grande qualità: a cumunicazione di Patrizia GATTACECA fatta à iss’occasione custindi. Hè un spostu illustratu è zeppu, nantu à e vie di a spressione di u cantu corsu da l’anni di u Riacquistu sinu à e pruduzzione attuale. A spiicazione si arremba dinù nantu à parechji puntelli cum’è i dischi stampati, ritratti, sequenze filmate di cuncerti, via un materiale riccu assai accumpulatu cun l’affollu di parechji appassiunati di cultura corsa cum’è Ghjuvan Antone ORTICONI, un giovanu musicante di Palmentu. U più di a robba esposta è spiicata durante sta mostra in u Spaziu Natale Luciani, l’hà accoltu è assestatu ellu.
Issu travagliu, descrittivu è analiticu, Patrizia u porta cun pazienza è primura. Si spera ch’ella u puderà publicà frà pocu a cantarina chì si hè fatta osservatrice è critica di un fenomenu di primura pè a cultura nustrale.