Hè ghjuntu u numaru 43 di a rivista literaria "Bonanova"

(Éditions Albiana / Associu di sustegnu di u CCU / Università di Corsica)

Ritruvate i testi di :

Pasquale Baldovini, Guidu Benigni, Alain Di Meglio , Stella Emmanuelli, Paulu Michele Filippi, Patrizia Gattaceca, Francesca Graziani, Petru-Santu Menozzi, Paolo Odorico, Pasquale Ottavi, Ange-Toussaint Pietrera , Francesca Poli , Anghjulu Pomonti, Paulu Antoni Squarcini, Ghjacumu Thiers, Saveriu Valentini.

CAP’ARTICULU

Gistì spaziu, locu è piazza

            Hè isciutu avà avà u libru di Anghjulu Pomonti, La littérature d’expression corse entre tradition, politique et modernité (Albiana, 2021). A somma maiò di circa 550 pagini arricata, fruttu di una tesa sustinuta di nuvembri 2018 in Corti, palesa unipochi di fatti maiò. Frà tant’altri, n’avemu sceltu dui.

• U primu hè l’identificazioni di un oghjettu chjaru : a literatura di sprissioni corsa. Pomonti s’incamina cun cautezza da strigna u so studiu senza nigà l’asistenza di una litteratura corsa chì si godi parechji lingui, chì i principali sò u latinu, u talianu, u francesi è u corsu. Hè vera chì u sulcu era dighjà beddu tiratu da Fusina (Écrire en corse, Klincksieck, 2010) è dinò da una catasta impurtanti d’articuli è cunfarenzi varii, tutti quanti censati da Pomonti.
• U sicondu hè in u fattu d’avè una vista qualitativa è quantitava di ciò chì pudemu chjamà l’elaburazioni literaria di a lingua corsa. Pomonti faci a scelta ghjusta d’entra in i so analisi è prisentazioni cù l’opari, l’autori è, supratuttu, i testi. A missa in sesta crunulogica faci un passu in più da capì u sbucinamentu siculari di l’evuluzioni di issa sprissioni literaria. È tandu si palesa « A divizia », titulu di l’ultimu capitulu.

St’ultimi 25 anni, issa divizia di rumanzi, testi è puesia, marca una cima in u prucessu di long’andà discrittu è missu à fetti di tempu da Pomonti. A tradizioni fonda u puliticu chì iddu stessu metti in anda i cundizioni di u prugressu è a crescita di l’opari. Tandu i quistioni chì spuntani sariani : a l’avaremu fatta ? Saremu ghjunti à u scopu di una literatura di lingua corsa degna, ricunnisciuta è letta ?

Risposta difficiuli. Si sà solu chì issu prugressu ùn hè ghjuntu cusì sfaticatu è caminu ni ferma monda da fà mirzà a ganga diglossica chì, quant’è un certu viru, muta è crea varianti à misura ch’iddu s’avanza.

S’è no fighjulemu induva l’avemu buschi certi testi, si vidi chì à quandu nantu à una reti suciali, à quandu in un blog, à quandu in u fruttu di tali cuncursu. Vidimu chì u corsu literariu si ficca in i punteddi novi di a cumunicazioni. Ma quì ci hè appena di tuttu. A quantità hè fiumaresca è a qualità ci pò fà passà da u peghju à l’incantu. Ma quissa ùn hè pò spicificu à u corsu è fattu si stà chì, forsa, a divizia si sparti è si sparghji di più è chì u libru t’hà menu pesu.

Si voli vena à dì chì u corsu literariu pò essa in piazza publica, in lochi novi o in spazii cunquisti oghji in issu tempu di ritrusera di a diglussia. Ma ferma quantunqua a quistioni di una scelta, di un sguardu analiticu di ciò chì si dà à leghja. Ma a facilità di essa visti è letti oghji da una mansa di ghjenti ùn passa micca à u stacciu di l’edizioni o di tuttu un sistema di a ricunniscenza qualitativa.

            Più chè mai, l’attività di una rivista (in ligna o micca pocu premi), u rollu maiò di l’insignamentu, l’esistenza di ghjurii, u sviluppu di i studii è di a critica, i scelti edituriali o i varii dimarchji d’antulugizazioni, n’avemu bisognu da cuntrà u viziu di i varianti di a diglussia.

A. Di Meglio